A actividade aprazada pola folga de letrados poderá recuperarse nun ano segundo o presidente do TSXG
José María Gómez y Díaz-Castroverde, sinala que se xerou, aproximadamente, a suspensión de 18.800 actuacións xudiciais.
Por Europa Press / Redacción | A Coruña | 21/05/2023 | Actualizada ás 18:58
O presidente do Tribunal Superior de Xustiza de Galicia (TSXG), José María Gómez y Díaz-Castroverde, espera que a actividade aprazada nos xulgados de Galicia pola folga de Letrados da Administración de Xustiza se recupere "aproximadamente nun ano".
Nunha entrevista concedida a Cadea Ser Galicia e recollida por Europa Press, o presidente do TSXG lembrou que en Galicia xa hai "certa experiencia" con atrasos, primeiro coa folga de 2018 e logo coa paralización pola pandemia de Covid-19; situacións respecto das que xa se recuperou a normalidade.
Agora, Díaz-Castroverde sinala que se xerou, aproximadamente, a suspensión de 18.800 actuacións xudiciais. "Non van ser obxecto dunha actuación especial ou dun plan de continxencia, pero si dun tratamento en cada un dos xulgados", indicou.
Máis que en ámbitos xurisdicionais concretos, o presidente do Alto Tribunal galego apuntou que a afectación foi "transversal". Concretamente, afectou máis en Pontevedra que na Coruña.
Doutra banda, e preguntado polo veredicto do macroxuízo do Alvia, Díaz-Castroverde evitou dar un prazo concreto, aínda que si comentou, "a nivel persoal e non como presidente do TSXG", que podería exporse un prazo de tres a seis meses para a sentenza. "Pode ser --que chegue antes de final de ano--, pero non quero dicir nada para que a xuíza non senta presionada", incidiu.
Respecto deste tema, o presidente recoñeceu que a xustiza "podería ser máis áxil", pero para iso "habería que cambiar determinadas circunstancias". Entre elas, aumentar a cifra de xuíces profesionais (en España son 12 por cada 100.000 habitantes cando a media europea é de 18), modificar a organización territorial da xustiza, "do século XIX para unha xustiza que é do século XXI".
Ademais, informou de que para este ano solicitaron dúas prazas de maxistrado de audiencia (unha para a provincial da Coruña e outra de Pontevedra) e nove xulgados, entre eles de 1ª instancia na Coruña e Ourense. "Pero a verdadeira preocupación é a implantación de xulgados de violencia de xénero, con competencia comarcal e diferenciados do xulgado de instrución. Só temos na Coruña e Vigo e queremos nas sete cidades", remarcou. Espera, ademais, conseguilos este ano.
Por último, Díaz-Castroverde recoñeceu que en Galicia se incrementaron as agresións sexuais entre menores, aínda que non así as grupales. "Como sociedade debemos afrontar unha realidade que está present en todas partes. Como os accidentes de tráfico, todos pensamos que é algo que lle pasa aos demais e non a nós", afirmou.
"O primeiro é facer ver ás mulleres maltratadas que o están sendo e aos maltratadores, que pensan que son persoas marabillosas, o mesmo. Hai que conseguir tamén que as mulleres presenten máis denuncias. Este ano foron un 7% máis que o ano pasado. Hai unha cota de violencia de xénero oculta que hai que pór sobre a mesa", defendeu.
