Condenado un exmilitar da Armada por tráfico de drogas en Ferrol
O acusado recoñeceu os feitos nun acordo co fiscal; outros tres procesados están pendentes de xuízo.
Por Europa Press / Redacción | Santiago de Compostela | 03/07/2025 | Actualizada ás 12:34
Un home acusado de vender cocaína en Ferrol cando era militar aceptou un ano e seis meses de cárcere, así como o pago dunha multa de 300 euros no xuízo fixado para este xoves, día 2, na sección segunda da Audiencia Provincial da Coruña. Fíxoo tras un acordo entre o Ministerio Público e a defensa ao recoñecer os feitos e acordarse, en consecuencia, unha rebaixa da condena ao incluír a atenuante de dilacións indebidas.
Así mesmo, a avogada da defensa solicitou a suspensión da pena de prisión e a fiscal aceptou a petición. Por iso, o xuíz acordou a suspensión da súa execución coa condición de que o procesado non cometa delitos nun prazo de dous anos. Segundo consta no escrito fiscal, en total, nesta causa estaban acusados oito individuos, aínda que, segundo fontes consultadas por Europa Press, catro xa foron xulgados con anterioridade e outro tres están pendentes de selo.
DETENCIÓN E REXISTROS
De acordo co escrito fiscal, do procesados tres deles eran militares da Armada en Ferrol, de nacionalidade colombiana, que vendían cocaína a toxicómanos na cidade naval en 2009. En senllos rexistros nos seus domicilios en Narón incautáronse sustancias estupefacientes valoradas en 380 euros, básculas de precisión, diñeiro en metálico e unha arma de fogueo.
Os outros cinco individuos implicados, catro de nacionalidade dominicana e outro nacionalizado español, residentes en Lugo, no seu caso foron procesados por participar na rede como provedores da droga que despois vendían os militares. En diversos rexistros en domicilios de Lugo, incautouse droga cun valor de mercado superior aos 33.600 euros.
