Showcooking e visita guiada para pechar a exposición 'Fragmentos de onte'
Showcooking o 7 de xuño, e visita guiada con cata o 8 de xuño; ambas experiencias promovidas pola Adega Martín Códax na Sede Afundación de Vigo.
Por Galicia Confidencial | Cambados | 31/05/2023 | Actualizada ás 14:01
O sete de xuño, a Adega Martín Códax organiza un Showcooking na Sede Afundación de Vigo. Benigno Couso, achegará a tódolos asistentes a cociña da Taberna Patouro, un espazo gastronómico cun novo concepto para os amantes da cociña exquisita, evolucionando a cociña tradicional e atopando a esencia dos sabores de Galicia.
Dende a organización comunican que quedan aínda prazas dispoñibles que se poden reservar dende a páxina web de Martín Códax.
VISITA GUIADA CON CATA COMENTADA
Da man da Asociación Etnográfica Sete Espadelas, o oito de xuño os visitantes que se acheguen á Sede Afundación de Vigo poderán coñecer toda a historia e detalles das obras de Ruth Matilda Anderson e de como era o día a día na Galicia dos anos 20.
Tras finalizar a visita, os asistentes poderán realizar unha cata comentada cunha selección das elaboracións singulares da Adega da man dun dos nosos sumilleres.
Pódense reservar prazas na web da adega organizadora.
