Fortes chuvias en Ourense e inundacións na capital lucense
As precipitacións foron de 30 mm nunha hora.
Por Europa Press / Redacción | SANTIAGO DE COMPOSTELA | 04/06/2023 | Actualizada ás 21:44
As intensas choivas que afectan durante este domingo ás provincias de Ourense e Lugo provocaron inundacións na capital lucense, onde se viron afectado baixos e outras edificacións como a estación de autobuses da cidade ou mesmo o Hospital Universitario Lucus Augusti (HULA).
Algunhas das rúas principais da cidade amurallada, como a Avenida de Lugo e Fontiñas, víronse alagadas, chegando a levantarse mesmo as tapas dos sumidoiros. A Axencia Estatal de Meteoroloxía alertaba esta tarde de que as precipitacións serían intensas e poderían producirse acumulados de ata 30 mm nunha hora.
A Dirección Xeral de Emerxencias e Interior da Vicepresidencia Segunda da Xunta activaba esta mañá a alerta laranxa por choiva na montaña de Ourense e de Lugo, así como no sur desta última provincia. Segundo a Axencia Estatal de Meteoroloxía (AEMET), o fenómeno meteorolóxico adverso de nivel laranxa comeza ao mediodía deste domingo cunha precipitación acumulada nunha hora de ata 30 mm.
Ademais, estarán en alerta amarela o centro de Lugo, xa que se prevé unha precipitación acumulada nunha hora de 20 mm, así como o interior da Coruña e de Pontevedra, e as zonas noroeste, Miño, sur e Valdeorras de Ourense, onde se espera unha precipitación acumulada nunha hora de 15 mm.
A maiores activouse a alerta amarela por treboadas nos interiores da Coruña e de Pontevedra, en Ourense, no centro, sur e montaña de Lugo.
