O 112 Galicia colabora con 'influencers' para difundir consellos en prevención e atención ás emerxencias

O Centro Integrado de Atención ás Emerxencias (CIAE-112) de Galicia acolleu este luns un encontro entre os seus responsables e diversos 'influencers' e personalidades relevantes da comunicación, co fin de amplificar o labor de difusión que se fai en relación cos consellos de prevención e atención ás emerxencias.

O xerente da Axencia Galega de Emerxencias, Marcos Araújo, acompañou aos participantes nesta xornada, coa que se pretende difundir o concepto de 'sentidiño', que o 112 Galicia xa utiliza nos seus perfís de redes sociais desde hai anos (#sentidiño). Con esta colaboración, preténdese facilitar a interacción con sectores da sociedade, como os máis novos, a través de 'influencers' e comunicadores como Eloy TP, Alberto Sxenick, ou a 'tiktoker' María Foscaldo, Meryfos (coñecida como A Repunante).

Entre os principais obxectivos da visita está a procura de puntos comúns na comunicación, para aproveitar ao máximo a potencialidade das redes sociais como "espazo de concienciación". Os participantes puideron coñecer de preto o traballo informativo que leva a cabo na web do 112 Galicia, e nas redes sociais Twitter e Facebook. A xornada incluíu un percorrido polas diferentes salas e departamentos do CIAE, onde puideron ver como se xestionan as chamadas a Emerxencias e coñecer distintos materiais e recursos dos que dispón o Grupo de Apoio Loxístico e de Intervención (GALI).

Visita de 'influencers' ás instalacións do CIAE 112 Galicia na Estrada (Pontevedra).. XUNTA DE GALICIA | Fonte: Europa Press