Pese aos bos resultados o Foro Ecónimo advirte do posible "arrefriamento da economía"

O director do Foro Económico de Galicia, Santiago Lago, prevé que no segundo semestre de 2023 e 2024 vaise a "arrefriar" a economía, con medidas como manter a subida dos tipos de interese, a través dunha política monetaria en Europa "máis contractiva" en busca de atallar a inflación.

En rolda de prensa, fixo balance dun primeiro trimestre de 2023 no que as economías de Galicia e España son "referencias de crecemento" fronte a outros países europeos, cunha alza do PIB que "se acelerou" e descartouse o risco de recesión. Con todo, avisa de que coa política monetaria europea "está a tentarse arrefriar a economía" en próximos trimestres.

E é que identifica o actual crecemento cun mundo pospandemia no que a "xente quere gozar", o que explica as taxas de subida "espectaculares" no sector turístico e hosteleiro no arranque de 2023, onde os cidadáns aínda fan uso do aforro "embalsamado" durante a crise da covid. Isto produce que non se free a economía a pesar de "os elementos de incerteza". En contraposición, advirte dun cambio de paradigma a finais deste ano, cando "as cousas non estean tan ben".

Así mesmo, Lago razoa que, de cara a 2024, haberá que "empezar a axustar o déficit máis do que se está facendo nestes momentos". Pon o exemplo de que España está a crecer máis que Alemaña -entrou en recesión técnica no primeiro trimestre-, pero lembra que a economía xermana conta cun menor déficit que lle permitiu afrontar nunha posición máis favorable a crise do coronavirus. Opina que "ter o déficit controlado" permíteche "ter mais soberanía en política económica cando tes que usala".

ALZA NO PRIMEIRO TRIMESTRE

Pola súa banda, o Foro Económico referiuse ao bo comportamento do primeiro trimestre da economía galega cunha alza do 2,8%, aínda que está case punto e medio por baixo do 4,2% de avance na media española. De tal forma, refugou "escenarios catastrofistas" no curto prazo para Galicia e España. Neste sentido, as exportacións do primeiro trimestre funcionaron "moi ben", con puntos negros estruturais como a produtividade.

LOXÍSTICA DE PROXIMIDADE

O economista Fernando González Laxe chamou a atención acerca de que a economía galega "gañou tracción" no primeiros tres meses de 2023, unido á recuperación de comercio e hostalaría. Resalta que o investimento empresarial elevouse "moito máis" que a media da economía galega, con tirón das industrias enerxética e extractivas. E aparece un fenómeno como é "a nova loxística de proximidade", un pequeno cambio na estrutura produtiva galega na procura de dotar de insumos a outras compañías autóctonas.

Con todo, Laxe bota en falta maior diversificación nas exportacións ao acaparar o 50% só tres sectores -automoción, téxtil e conservas de peixes-, do mesmo xeito que o 40% das vendas ao exterior vanse a Francia, Portugal e Italia -aínda que observa brotes cara a África e América-. Tamén pon o foco en que tanto a administración central como a galega "deixaron de investir, consumir e crecer" nos últimos meses, cuestión que lle sorprende ao relacionarse o período electoral con "grandes consumos", pero "esta vez non".

EMPREGO 

En materia de emprego, José Francisco Armesto valora o "bo comportamento en termos agregados", cunha caída do desemprego e a temporalidade -que achaca á reforma laboral-. Aínda así, avisa de que o dinamismo de creación de emprego é "menor" que a economía española, aínda que a taxa galega de desemprego segue sendo máis reducida.

O emprego créase fundamentalmente no sector servizos, principalmente en educación, que contrasta cunha caída da industria manufactureira, un emprego, "en xeral, de maior calidade". Por iso, cre necesarias políticas que aumenten a ocupación da industria manufactureira.