Monumentos galegos feitos con pezas do mítico ‘Exin Castillos’

A "Asociación Exin Castillos y West" recoñécense como “un grupo de nostálxicos que mantemos viva a ilusión dese xoguete de construción español dos anos 70-80”. Actualmente conta con 35 socios, dos cales 7 deles están en Galicia, sendo a súa finalidade a promoción do xogo de construción por medio de exposicións e asistindo a feiras e eventos.

Agora mesmo teñen a colección "Galicia Monumental" no Centro de Interpretación do Dolmen de Dombate, en Cabana de Bergantiños. Esta exposición poderá verse todos os días da semana de balde ata setembro.

A Torre de Hércules, a Iglexa de Sta María de Cambre, o Faro de Fisterra, o Pazo de Meirás e o de Torres do Allo, o Torreón dos Andrade, o Castelo de Doiras e o de Moeche, a Catedral de Tui.... son algunhas das réplicas, pero a que máis destaca pola súa espectacularidade e dimensións é a Fachada do Obradoiro da Catedral de Santiago (220cm de alto e 30.000 pezas).

A construción das maquetas a escala supón un traballo previo de documentación profundo en bibliotecas e arquivos, con elaboracións que lles levan entre 6 meses e 1 ano dependendo da complexidade e tamaño do monumento.

Para coñecer máis ao detalle a súa actividade pódese seguir a súa páxina de Facebook: www.facebook.com/GaliciaconExinCastillos.