A poboación inmigrante, o futuro de Galicia e de España
Galicia volve superar os 2,7 millóns de habitantes tras gañar máis de 6.000 persoas nun ano.
Por Europa Press / Redacción | SANTIAGO DE COMPOSTELA | 08/08/2023 | Actualizada ás 11:05
A poboación galega superou os 2,7 millóns de persoas no segundo trimestre deste ano, o que supón un 0,09% máis que nos tres meses anteriores, segundo datos do Instituto Nacional de Estatística (INE), recollidos por Europa Press.
Desta maneira Galicia queda por baixo do incremento medio nacional, xa que no total de España a poboación subiu un 0,28% entre abril e xuño, ata 48,34 millóns de persoas. No último ano, Galicia gañou máis de 6.000 persoas e no último trimestre, máis de 2.400 habitantes. Desde xaneiro, a Comunidade contabilizou un incremento dunhas 1.700 persoas, porque no primeiro trimestre a poboación caeu e no segundo volveu recuperarse.
Por sexos, un 51,9% da poboación galega é muller, mentres que os homes representan o outro 48,1% a 1 de xullo de 2023.
DATOS ESTATAIS
A nivel estatal, a poboación aumentou en 135.186 persoas o segundo trimestre, situándose en 48.345.223 habitantes a 1 de xullo de 2023, sendo o valor máximo da serie histórica. En termos anuais, o crecemento poboacional estimado é de 537.611 persoas.
Atendendo á información do INE, este crecemento poboacional de España debeuse, case na súa totalidade, ao incremento de persoas nadas no estranxeiro, que foi de 8.457.886 persoas, maior que a de nacionalidade estranxeira.
O número de estranxeiros aumentou no Estado en 100.394 persoas durante o segundo trimestre, ata un total de 6.335.419 a 1 de xullo de 2023. Pola súa banda, a poboación de nacionalidade española aumentou en 34.792 persoas.
