O xuíz Vázquez Taín sancionado polo CGPJ porque o seu traballo cunha produtora é incompatible co seu cargo
O maxistrado tamén intervén asiduamente como tertuliano e colaborador en varios programas de televisión, como o Programa de Ana Rosa (Telecinco) ou o 'Quen anda aí' (TVG).
Por Europa Press / Redacción | Santiago | 14/09/2023 | Actualizada ás 14:36
O Consello Xeral do Poder Xudicial (CGPJ) sancionou ao xuíz José Antonio Vázquez Taín ao considerar que o seu traballo cunha produtora audiovisual é incompatible co seu cargo como titular do Xulgado do Penal Número 2 da Coruña.
Fontes do órgano de goberno dos xuíces confirmaron a Europa Press que a Comisión Disciplinaria acordou esta semana suspender ao xuíz --coñecido por ser instrutor de casos como o do roubo do Códice Calixtino da Catedral de Santiago ou do asasinato de Asunta-- durante 10 días por unha "falta moi grave".
Foi o pasado xuño cando se deu a coñecer que o CGPJ abrira un expediente disciplinario ao xuíz galego despois de que o promotor da acción disciplinaria do órgano comprobase que Vázquez Taín exercía outras actividades alleas á xudicatura sen solicitar o permiso necesario.
Nos últimos anos, o xuíz presentou dúas obras audiovisuais. A primeira, 'Peregrinas', un documental sobre a muller no Camiño de Santiago estreado en 2022. En marzo pasado, presentou 'O camiño mozárabe: sangue, suor e fe', un documental que narra a historia da Vía da Prata producido pola empresa Amarola Producións.
VARIOS LIBROS
Ademais, Vázquez Taín escribiu sete libros, entre os que destaca 'A lenda do santo oculto', onde se atopan paralelismos co caso do roubo do Códice Calixtino ou 'Al infierno se llega de prisa', que trata sobre a desaparición dunha nena.
O maxistrado tamén intervén asiduamente como tertuliano e colaborador en varios programas de televisión, como o Programa de Ana Rosa (Telecinco) ou o 'Quen anda aí' (TVG).
