Medio Rural comprométese a mellorar as pistas forestais das concentracións parcelarias de Oroso
Xunta e Concello tamén se emprazaron a impulsar o viveiro da Falmega, que ocupa 16 hectáreas e é propiedade do Goberno galego.
Por Europa Press / Redacción | SANTIAGO DE COMPOSTELA | 14/09/2023 | Actualizada ás 16:43
O conselleiro do Medio Rural, José González, abordou este xoves co novo alcalde de Oroso, Alexander Doval, cuestións relacionadas co ámbito rural, como a mellora de pistas forestais de concentracións parcelarias.
Este asunto foi un dos temas analizados no encontro mantido polo responsable de Medio Rural con parte do novo equipo de goberno do concello da comarca de Santiago, celebrado no edificio administrativo de San Caetano.
Alí, segundo recolle un comunicado da Xunta, analizáronse cuestións como a remodelación de pistas na zona de Senra-Cardama-Vilaromaris, que abarca 1.366 hectáreas. Así mesmo, ambas as administracións tamén se emprazaron a impulsar o viveiro da Falmega, que ocupa 16 hectáreas e é propiedade do Goberno galego.
