O PP de Ourense cualifica de "actitude intimidatoria" o comportamento de Jácome co funcionariado do Concello

O PP de Ourense reprochou a "actitude intimidatoria" do alcalde da cidade, Gonzálo Pérez Jácome (Democracia Ourensana), con respecto aos funcionarios do concello despois de que o rexedor asegurase que persoal do equipo de Alcaldía realizará "roldas de comprobación do cumprimento da xornada laboral" dos traballadores.

Nun comunicado remitido este mércores, Jácome trasladou que el mesmo ou persoal do seu equipo realizarán estas roldas, nas que se comprobará o horario laboral dos traballadores, que desde esta semana volve ser o de inverno con 37,5 horas semanais, desde as 07,45 ata as 15,15 horas.

Así mesmo, o rexedor sinalaba que todo o Concello debe cumprir este horario e que as xefaturas de servizo terán a responsabilidade de que o persoal subordinado así o faga. De non ser así "se lle abrirá expediente" tanto ao persoal que non o cumpra como ao seu respectivo xefe, como responsable.

Ante estas declaracións que o propio alcalde trasladoulles aos responsables das xefaturas de servizo nunha reunión mantida na mañá deste mércores, o Partido Popular saíu ao paso para rexeitar o que consideran unha "actitude intimidatoria".

"Entendemos que estas palabras socavan a dignidade e o bo facer da gran maioría do persoal", manifestou o edil Miguel Ángel Michinel, que engadiu que o persoal do concello de Ourense "cumpre con rigor e eficiencia" coas súas tarefas dentro do horario establecido.

Desde a formación popular opinan que se trata de "unha nova cortina de fume" para "eludir a responsabilidade política sobre a xestión" no consistorio. Unha xestión que indican que, "pese ao elevado número de asesores" continúa sendo "manifestamente deficiente".

"O alcalde continúa a súa estratexia de estigmatizar ao persoal técnico do Concello, un discurso populista onde os haxa e co que pretende facer que paguen moitos xustos por uns poucos pecadores", recriminou Michinel.

Así pois, asegura que desde o Partido Popular entenden que hai que proceder "con contundencia ante calquera incumprimento flagrante" dos labores funcionariales, pero "sempre tendo en conta que se trata de casos puntuais", polo que non ven necesario "ameazar con represalias a todo o conxunto do persoal municipal".

Ademais, consideran que "estas ameazas" poden "intuírse como unha velada iniciativa para tentar someter o traballo dos funcionarios ás esixencias políticas do grupo de goberno", de Democracia Ourensana. Por iso demandan que o alcalde "aborde os asuntos que realmente lle interesan aos ourensáns".

O alcalde de Ourense, Gonzalo Pérez Jácome, durante unha rolda de prensa | Fonte: Agostime - Europa Press