A Xunta presume da restauración da mina de Meirama

Poucas cousas ten a Xunta das que presumir en materia ambiental, por iso, aproveita ao máximo aquelas nas que investiu cartos e diñeiro para conseguir que sexan “referentes de restauración ambiental”. Un referente que a conselleira de Medio Ambiente, Territorio e Infraestruturas da Xunta, Ethel Vázquez, aplicou ao lago da mina de Meirama, en Cerceda (A Coruña). “Un claro exemplo de éxito pola súa integración visual e paisaxística”, dixo.

A restauración deste espazo consistiu na creación dun gran lago artificial no oco derivado do aproveitamento da mina, onde na actualidade existe un ecosistema poboado e colonizado, con gran diversidade biolóxica.

Outra das potencialidades que ofrece o lago, segundo a Xunta, é a promoción turística e o abastecemento de auga á área metropolitana da Coruña, grazas á execución dunha infraestrutura hidráulica coa que se duplicará a capacidade do encoro de Cecebre.

A Consellelleira participou este venres na presentación do libro "Biodiversidade do lago da mina de Meirama e a súa contorna", que permitirá, segundo dixo, establecer criterios máis eficaces de xestión para a mellor protección dos valores naturais.

O estudo recolle a identificación de máis de 800 especies, entre as que figuran máis de 300 clases de insectos, 85 variedades de aves ou 28 categorías de mamíferos.