Cambados Pode denuncia ameazas para darlle a alcaldía ao PPdeG
O 24 M Cambados viviu, como outras moitas vilas do país, un cambio histórico. Por vez primeira dende 1983 o PPdeG non logrou maioría abosoluta. Iso si, os conservadores foron os máis votados, con oito edís, e, segundo denuncian os independentes de Cambados Pode, están empregando ameazas anónimas para aferrarse ao poder.
Por Galicia Confidencial | Cambados | 26/05/2015 | Actualizada ás 23:45
Os oitos concelleiros do PP son insuficientes para gobernar se hai acordo entre as outro catro forzas. PSOE (3 concelleiros), Bloque (3 concelleiros), Participación Democrática Directa (PDDDG) (1) e Cambados Pode (1) suman un máis que os conservadores.
Este martes Cambados Pode denunciou presións para non coaligarse coas outras forzas e facilitar que o PP siga no poder. "Dende Cambados Pode queremos denunciar que algúns miembros do noso partido politico estan a sufrir amenazas anonimas para que fagamos a coaliccion co Partido Popular, tan valientes que nin a cara dan" alerta este partido político nun comunicado.
As ameazas, anónimas, parece que non van xurdir efecto, pois Cambados Pode tamén fai unha proclama da súa autonomía: "queremos facer publica tales fechorias para que a xente de Cambados vexan a clase que teñen no Partido Popular cas suas artimañas para gañar a alcaldia, dende aqui decirlles tamen que con amenzas con nos non van a poder, que vivimos nun pais libre, democratico e nós e solamente nós tomaremos a decision que vexamos mais correcta".
Un pacto con Cambados Pode, cuxo cabeza de lista é José Ramón Abal, é a única esperanza do PP para manter o poder. PSOE e BNG xa confirmaron a nivel nacional que nunca facilitarán unha alcaldía conservadora e o PDDDG é unha iniciativa cidadá de esquerdas, xurdida do proceso Somos Maioría, que en teoría tampouco se vai a sentar a dialogar cos conservadores.
