Podemos Galicia busca candidatura única con Sumar e Esquerda Unida de cara ás eleccións autonómicas
O partido tamén aprobou cambios na súa estrutura interna. Así, Juan Manuel Da Silva pasa a ser Secretario de Medio Ambiente, e a Secretaría de Organización pasa a ocupala Gloria Alonso.
Por Europa Press / Redacción | SANTIAGO DE COMPOSTELA | 07/10/2023 | Actualizada ás 18:31
Podemos Galicia aprobou a súa "folla de ruta" para as próximas eleccións autonómicas na que apostaron por unha "coalición unitaria das forzas galegas" en referencia a Sumar e a Esquerda Unida.
Así o acordaron no Consello Cidadán Galego, máximo órgano de decisión entre congresos de Podemos en Galicia, que se reuniu este sábado.
Segundo informou a formación morada, o documento recolleu que calquera proceso que leve a unha candidatura unitaria "debe empezar necesariamente" por un proceso previo de legitimación popular mediante unhas primarias nos que a cidadanía "debe de estar no centro do proceso deliberativo".
Podemos Galicia propuxo unha fórmula na que as listas e o proxecto programático sexan elixidos por votación cun único censo que xunte tanto as militancias das forzas políticas como a cidadanía de base "sen adscrición partidaria previa".
Ademais, expuxo que estas primarias tamén establezan mecanismos para xestionar a pluralidade do espazo á hora de desenvolver o seu labor parlamentario.
Así, ante a posibilidade dunha convocatoria electoral anticipada, solicitan a elaboración dunha axenda común "canto antes", xa que "os tempos na política contemporánea son frenéticos" polo que urxiu a "empezar a traballar desde xa".
O partido tamén aprobou cambios na súa estrutura interna. Así, Juan Manuel Da Silva pasa a ser Secretario de Medio Ambiente, e a Secretaría de Organización pasa a ocupala Gloria Alonso.
Pola súa banda, a Secretaria de Comunicación, Verónica Hermida, ocupará o cargo de Cultura e conserva as súas funcións como portavoz do partido. Ademais, a Secretaría de Comunicación recaerá en Luchi Dolisnii.
