Os traballadores auxiliares de Endesa nas Pontes concéntranse para reclamar unha transición xusta

Preto dun centenar de traballadores das empresas auxiliares da central térmica de Endesa nas Pontes de García Rodríguez concentráronse na mañá deste mércores, 11 de outubro, ante o edificio administrativo da Xunta en Ferrol, para asegurar que "o que se está producindo non é unha transición xusta", segundo manifestou un dos operarios, Celso Varro.

Así, trasladou que as compañías teñen contrato "ata o próximo 30 de novembro" e que desta maneira "de transición xusta temos moi pouco, xa que si que queda xente atrás, non o é", detallando que "os primeiros en quedar atrás, somos as compañías auxiliares, e non temos máis nada, non temos ningunha solución".

O operario detallou que "se fala de cursos, fálase de desmantelamento, pero a día de hoxe non temos nada serio encima da mesa, xa que nos falan duns cursos, pero dinnos que para acceder a eses cursos o primeiro que temos que facer é estar no paro". A día de hoxe nestas instalacións continúan algo máis de cen operarios de auxiliares.

SUPENSIÓN DE REUNIÓN

Celso Varro detallou que se concentraron en Ferrol, ante o edificio da Xunta, porque "para hoxe había concretada unha reunión onde estaban todas as partes que tiñan que achegar solucións ao noso problema", como son Instituto de Transición Xusta, Xunta, Concello das Pontes, Endesa e sindicatos, "pero desconvocouse e non sabemos moi ben o motivo e tampouco nos achegan unha solución a cando se convocaría de novo esa reunión".

Por último, este operario, detallou que na planta están a realizar "algúns traballos residuais, tanto de produción como de mantemento pero xa orientados a un posible desmantelamento, ou sexa, a un peche" e que estes traballadores piden "unha transición xusta, real e que nos teñan ocupados ata que todos estes proxectos que andan por aí no aire, que din que van vir, que non vemos tampouco claridade neles, nin como van facer os desmantelamentos", xa que "entendemos que se agora mesmo nos imos ao paro, xa non temos solución, porque cada un terá que buscarse a vida pola súa parte".

Concentración en Ferrol dos traballadores das auxiliares de Endesa nas Pontes para reclamar 'unha transición xusta' | Fonte: Europa Press