Diferentes programas apoiados pola Deputación da Coruña crearán máis de 1.500 postos de traballo
"O obxectivo é impulsar a creación de emprego, sobre todo no ámbito rural, para loitar contra a perda demográfica nos concellos de menos de cinco mil habitantes", puntualizou o presidente González Formoso.
Por E.P. | SANTIAGO DE COMPOSTELA | 18/10/2023 | Actualizada ás 14:58
A Deputación da Coruña publicou no Boletín Oficial da Provincia (BOP) a convocatoria de doce programas para a creación de emprego nos concellos e a mellora dos servizos públicos municipais. Contan cun orzamento total de 18,6 millóns para o financiamento de 1.550 postos de traballo.
Así o explicaron o presidente do organismo provincial, Valentín González Formoso, e o vicepresidente, Xosé Regueira Varela, este mércores, na presentación destas axudas.
"O obxectivo é impulsar a creación de emprego, sobre todo no ámbito rural, para loitar contra a perda demográfica nos concellos de menos de cinco mil habitantes", puntualizou González Formoso.
"Anticipamos, reformulamos e concentramos estas liñas de axudas que van permitir a contratación de persoal diverso a partir do 1 de xaneiro de 2024", engadiu, en diferentes ámbitos como Cultura, Deportes, Medio Ambiente, Normalización Lingüística, Promoción Económica, Emprego e Servizos Sociais.
Regueira, pola súa banda, recalcou que estas convocatorias "garanten a prestación de servizos de calidade nos concellos e que se poidan prestar con normalidade".
