Por E.P. | SANTIAGO DE COMPOSTELA | 23/10/2023 | Actualizada ás 19:43
O pleno do Concello de Pontevedra aprobou, cos votos do tres grupos -PP, BNG e PSOE- unha moción impulsada polos populares e que, tras as emendas incorporadas, frutificou nun texto no que se condena a "violencia" de Hamás nos atentados en Israel e os "actos de terror" sobre a poboación civil palestina.
"Pontevedra non pode ser inmune a este atentado", sinalou o portavoz do PP, Rafa Domínguez, que lembrou que Hamás utilizou unha "crueldade inusitada" contra Israel. O grupo municipal do Partido Popular aceptou as emendas presentadas polo BNG e polo PSOE para "non xerar polémica".
O BNG presentou unha emenda centrada na necesidade de reclamar a Israel que "pare xa" de bombardear a Palestina e permita a apertura de corredores humanitarios "ininterrompidos" para asistir á poboación civil porque "é urxente que non morra máis xente".
O Grupo de Municipal do PSOE tamén presentou unha emenda de adición á moción do PP na que se insta ao Pleno do Concello a condenar os ataques terroristas de Hamás contra Israel e ao Goberno de España a que defenda que a Unión Europea manteña as axudas de carácter humanitario dirixidas ao pobo palestino, garantindo que ningún financiamento finalice dando soporte a organizacións terroristas.
OS SOCIALISTAS ENGADEN UN PUNTO Á PROPOSTA DO PP
Os socialistas apoiaron o contido expresado na proposta 'popular', pero consideraron necesario que se engadise un novo punto no que se incluise un rexeitamento expreso aos ataques e accións de asedio (cortes de auga, alimentos e subministración eléctrica) contra os dous millóns de civís que habitan na franxa de Gaza.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.