Pontevedra, terceira cidade galega cos alugueres máis elevados, propón crear unha ordenanza para as vivendas turísticas

O grupo municipal do Partido Socialista levará ao pleno do Concello de Pontevedra unha moción na que se propón a elaboración dunha Ordenanza de Vivendas de Uso Turístico. Os socialistas, segundo anunciou este martes o seu portavoz, Iván Puentes, pretenden "que se regule e limite a implantación de novos aloxamentos deste tipo en todo o termo municipal", especialmente no centro histórico, e que se establezan as condicións para legalizar as VUT que xa existen na cidade.

A proposta tamén expón a creación, no seo da Comisión de Urbanismo, dun grupo de traballo para a regulación das vivendas de uso turístico no concello de Pontevedra. A súa idea é que este grupo de traballo, no prazo dun ano, estude as modificacións necesarias a introducir no Plan Xeral de Ordenación Urbana e no plan especial de protección do centro histórico, para "ordenar convenientemente" este tipo de vivenda no municipio de Pontevedra.

Puentes anunciou a apertura dun "período de diálogo" co sector e defendeu "unhas medidas que serán beneficiosas para todos" xa que, ao seu xuízo "os veciños terán máis facilidade de acceso á vivenda" e os empresarios do sector turístico verán regulada a competencia e tamén "os actuais propietarios de VUT gañarán seguridade xurídica, regulación da competencia e maior calidade deste tipo de aloxamentos".

O portavoz local do PSOE incidiu en que Pontevedra é, segundo os datos do Observatorio Galego da Vivenda, "a terceira cidade de Galicia cos alugueres máis elevados, superada unicamente por Coruña e Vigo", dixo Iván Puentes. Ante esta situación, Iván Puentes considera que "non facer nada significaría expulsar aos veciños e veciñas da cidade e dar o primeiro paso para a morte de Pontevedra como capital e como cidade residencial, reducíndoa a un parque temático para turistas".

Letreiro de Pontevedra xunto á Praza da Ferrería, na cidade de Pontevedra | Fonte: Europa Press - Arquivo