O PPdeG traslada a tensión política contra Sánchez aos concellos galegos cunha lista alternativa na Fegamp

O PP galego decidiu finalmente rexistrar unha candidatura propia á Presidencia da Federación Galega de Municipios e Provincias (Fegamp) encabezada polo alcalde do Incio (Lugo), Héctor Corujo.

A lista dos populares confrontará este mércores na Asemblea Xeral da Fegamp que se celebra en Santiago coa dos socialistas, que postulan ao rexedor de Vilagarcía, Alberto Varela, como aspirante a reelección para continuar catro anos máis á fronte da entidade.

A decisión do PP foi comunicada mentres se celebra o acto inicial co que arrincou no Pazo de Congresos da capital galega o conclave da Fegamp, que concluirá coa elección da súa nova directiva nunhas votacións nas que o PSOE está en disposición de reter a Presidencia da organización que representa aos 313 concellos e ás catro deputacións galegas.

Nun comunicado, o PP acusa ao PSOE de querer "politizar" as institucións "á imaxe e semellanza" do seu líder nacional, Pedro Sánchez, quen se somete este mércores á sesión de investidura no Congreso.

Así mesmo, os populares afean aos socialistas o encontro mantido por Alberto Varela este luns co candidato do PSdeG á Xunta, José Ramón Gómez Besteiro, o que cualifican como unha mostra de "partidismo" e "descaro".

CRÍTICAS DO PSdeG

Pola súa banda, o  PSdeG acusou ao PP de "romper" de forma "unilateral" a lista unitaria para a dirección da Federación Galega de Municipios e Provincias que, segundo o secretario de Organización dos socialistas galegos, José Manuel Lage Tuñas, negociouse ata o martes, véspera da asemblea que este mércores celebra a entidade que representa ás entidades locais galegas.

"Lamentamos que o Partido Popular, importando a crispación do espazo madrileño, se adique a romper un diálogo constante que se produce na Fegamp", sinalou o responsable do PSdeG en declaracións aos medios tras o arranque da asemblea, cando se coñeceu que o PP presenta lista propia á executiva da Fegamp que encabeza o alcalde do Incio, Héctor Cajoto.

Para os socialistas galegos, que están en disposición de reter a Presidencia da Fegamp para que continúe outro mandato o alcalde de Vilagarcía, Alberto Varela, o movemento do PP é unha mostra do seu "nerviosismo" pola celebración de eleccións galegas nos próximos meses.

DEFENSA DE BALANCE

No entanto, o presidente da FEMP, Alberto Varela, avogou por "non aprazar" as demandas "históricas" dos concellos para mellorar as súas canles de financiamento e delimitar as competencias que asumen co "esforzo" das súas arcas para prestar servizo aos seus veciños.

Así o defendeu no discurso no que fixo balance da súa xestión do mandato no arranque do XI Asemblea Xeral da Fegamp, que ten lugar este mércores no Pazo de Congresos de Santiago e que foi inaugurada á primeira hora da mañá con presenza da alcaldesa de Santiago, Goretti Sanmartín, e da directora xeral de Administración Local, Natalia Prieto.

Tamén a rexedora compostelá apelou por actuar con "altura de miras" en "un momento moi importante" a nivel político no que os concellos deben seguir exercendo o seu papel de administración "máis pegada" aos seus veciños.