Feijóo: “Non me asubiaron a min, senón ao presidente do Centro Galego”
O presidente galego suliña que os apupos recibidos en Londres eran de emigrantes que “non pertencían ao centro galego” e que “a maioría non eran galegos”. Algúns lectores din que Feijóo marchou escoitando a canción “Adios con el corazón”.
Por Galicia Confidencial | Compostela | 26/06/2015 | Actualizada ás 10:00
O presidente da Xunta de Galicia, Alberto Núñez Feijoo, recoñece que sufriu un episodio lamentable durante un acto que se celebrou no Centro Galego de Londres o pasado sábado tras os “asubíos” de parte dos presentes a unha comida que conmemoraba o Día de Galicia nesa sociedade.
Con todo, e preguntado por GC sobre esta cuestión, Feijóo quixo aclarar o acontecido e suliñou que, en ningún momento, os asubíos foran contra el, senón contra o presidente do centro, Nicolás Miño. “Ese acto desenvolveuse con absoluta tranquilidade. Había un grupo de persoas que increparon ao presidente do Centro Galego de Londres, cousa que lamento porque me parece que é un bo presidente e non se merece ese tipo de actos. Polo que me dixo, non pertencían ao centro galego e a maioría deles non eran galegos”, xustificou.
A Xunta enviou un comunicado aos medios o pasado domingo –sen foto-- sobre un suposto discurso pronunciado por Feijóo neste centro. Preguntado por esta cuestión, o presidente da Xunta suliñou que “participou en dous actos, un pola noite no que participei e outro ao día seguinte no que participou o presidente do Centro Galego”.
Sen embargo, nese comunicado, suliñase textualmente “durante os actos de celebracións do Día de Galicia no Centro Galego de Londres en Londres, Feijóo destacou a necesidade de lembrar sempre de onde vimos e cal foi o punto de partida da Galicia de hoxe”. Foi, por iso que algún lector se puxo en contacto con este medio para negar que ese discurso se tivera producido e para asegurar que Feijóo fora “apupado” polos presentes.
Segundo algúns destes lectores, estaba previsto que Feijóo falara durante esa comida pero que, finalmente, non foi posible, porque a xente comezou a asubiar cando o presidente do centro insistiu en destacar as cualidades do líder popular e en presentalo como un dos mellores presidente de Galicia. “O presidente do centro quentouse e meteu a pata aínda máis fondo... A cousa tornou en cachondeo..”, apunta un lector. “Feijóo escusouse e marchou en medio de cánticos de 'Adios con el corazón'”.
