Por E.P. | SANTIAGO DE COMPOSTELA | 22/11/2023 | Actualizada ás 16:53
O tres grupos do Parlamento galego --PP, BNG e PSdeG-- mostraron o seu apoio a que se manteñan nas Pontes os 1.400 MW de evacuación da central térmica de Endesa que deixou de funcionar o pasado mes de outubro.
A iniciativa, debatida na sesión do martes a proposta do BNG e que foi votada na mañá deste mércores no pleno da Cámara autonómica, apela á Xunta a defender ante o Goberno central que se convoque de forma "urxente" o concurso de transición xusta para adxudicar 700 MW dos grupos 3 e 4 do nó das Pontes empregando "o mesmo procedemento" que o seguido para a central de Andorra-Teruel.
Ademais, avogan por que permanezan como "dispoñibles para o sistema os dous grupos restantes" mentres "non se garantan as condicións socioeconómicas necesarias" para levar a cabo "unha verdadeira transición" coa posta en marcha dos proxectos alternativos ideados para a zona das Pontes.
Ademais, os grupos tamén reclaman a convocatoria da mesa de transición xusta das Pontes coa participación de Redeia como "operador do sistema".
ALCOA
Tamén foi aprobada outra iniciativa de impulso en defensa da continuidade de Alcoa na Mariña grazas á maioría absoluta do PP, que contou co apoio do BNG e a abstención do PSdeG, que botaron en falta máis demandas á Xunta nunha proposición que vían exclusivamente centrada no Goberno central, algo que tamén apreciaron os nacionalistas.
"A 40 días da data para a reactivación (das dúas cubas paradas desde principios de 2022, queremos que o Parlamento o diga alto e claro: Enerxía, solución!", exclamou desde o estrado o deputado do PP José Manuel Balseiro, encargado de defender unha proposta que volve demandar ao Goberno a aprobación dun marco estable de prezos enerxéticos para a planta da multinacional estadounidense en San Cibrao --Cervo--.
Despois de censurar que o acordo de PSOE e BNG para a investidura de Sánchez non incluíse compromisos para Alcoa, Balseiro remarcou que o de San Cibrao "non é un problema industrial, é enerxético" como, di, queda claro coa lema dos traballadores de "enerxía, solución".
Por iso, lamentou que "dous anos despois" do acordo para a paralización das cubas de aluminio que deberían reactivarse a comezos de 2024 "non se avanzou nada" na posta en marcha de mecanismos de prezos que fagan que a planta sexa "competitiva" e, así, poidan "manterse" os postos de traballo.
"Moitas grazas por tanta promoción ao acordo do PSOE e do BNG. Grazas, porque na TVG disto non sae nada", espetou o deputado nacionalista Daniel Castro, que criticou que o PP poña o foco exclusivamente no Goberno central e non demanda "absolutamente nada" á Xunta.
Pola súa banda, a deputada do PSdeG Patricia Otero coincidiu con esta análise sobre a ausencia de esixencias ao Goberno galego, que pretendía introducir a través dunha emenda que foi rexeitada polo grupo do PP.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.