Díaz celebra a constitución de Sumar en Galicia: "Tocaba botar raíces para chegar máis lonxe"
Configura así a súa primeira estrutura territorial.
Por Europa Press / Redacción | MADRID | 22/11/2023 | Actualizada ás 18:54
A líder de Sumar, Yolanda Díaz, celebrou a constitución das súas marcas autonómicas en Galicia e País Vasco. "Dixemos que tocaba botar raíces para chegar máis lonxe. Hoxe xa é unha realidade Sumar Galicia e Sumar Mugimendua. Benvidas e grazas por andar este camiño de compromiso e transformación", trasladou nun comentario na rede social 'X'.
Sumar constituíuse en Galicia e País Vasco como partido político e prepárase para concorrer ás próximas eleccións autonómicas, para o que hai conversacións preliminares abertas nos dous casos con formacións como Podemos e EU con vistas a explorar candidaturas de unidade, sen que ese horizonte estea definido a día de hoxe. Así, o proxecto liderada por Díaz a nivel nacional configura a súa primeira estrutura territorial, aínda que nas dúas comunidades os seus promotores remarcan que operarán de forma autónoma e federada á marca estatal.
UNHA XEFA DE GABINETE GALEGA
A galega Virginia Uzal, que xa ocupaba un posto de máxima confianza coa vicepresidenta segunda e Ministerio de Traballo, ascende agora a xefa de gabinete deste departamento en substitución de Josep Vendrell, que asume o cargo de coordinador executivo de Sumar.
Uzal é graduada en Xornalismo, máster en Comunicación Cultura e Cidadanía Dixitais pola Universidade Rei Juan Carlos de Madrid, en colaboración co Medialab Prado; e tamén ten un máster en Dirección de Comunicación Empresarial e Institucional pola Universidade Autónoma de Barcelona.
Foi a directora de comunicación da vicepresidenta segunda e ministra de Traballo e Economía social na última lexislatura e ostentou o mesmo cargo entre 2016-2020 en En Marea, no Grupo parlamentario Unidas Podemos-En Comú Podem-En Marea, no Congreso dos Deputados. Antes da súa etapa institucional colaborou con diversos medios e traballou como tradutora e editora de libros ademais de elaborar unha guía de viaxes con Lonely Planet.
SECRETARIOS DE ESTADO
Pola súa banda, o nomeamento dos secretarios de Estado previsto inicialmente na orde do día para o Consello de Ministros deste mércores non se completou a falta de determinar algúns cargos, segundo fontes consultadas. Entre estes nomeamentos pendentes está o do vigués Rubén Pérez como secretario de Estado do Ministerio de Mocidade e Infancia, que dirixe a súa compañeira de partido, Sira Rego.
