A Xunta subvencionará aos promotores con 50.000€ por vivenda construída que destinen ao aluguer
Mobilizará 56 millóns para fomentar o acceso á vivenda, a través do aluguer ou a compra.
Por Europa Press / Redacción | SANTIAGO DE COMPOSTELA | 23/11/2023 | Actualizada ás 13:56
A Xunta de Galicia porá en marcha un paquete de medidas cun total de 56 millóns de euros para fomentar o acceso á vivenda, entre as que se inclúen axudas de ata 50.000 euros por vivenda que os promotores constrúan para destinar ao aluguer.
As medidas foron anunciadas este xoves polo presidente da Xunta, Alfonso Rueda, na rolda de prensa posterior á reunión do seu Goberno, na que a vicepresidenta segunda e conselleira de Medio Ambiente, Territorio e Vivenda, Ángels Vázquez, debullou as partidas.
En concreto, conforme indicou a conselleira, a Xunta destinará un total de 56 millóns de euros para fomentar o acceso á vivenda, a través do aluguer ou a compra, así como mediante apoios aos promotores que constrúan inmobles para alugar. Do total de 56 millóns, detallou, 44 irán para estas dúas liñas de apoio e 12 destinaranse á rehabilitación. Unhas partidas que a Xunta prevé ampliar cos 24 millóns de fondos europeos pendentes de repartición por parte do Goberno central.
AXUDAS AO ALUGUER
"Adquirir, alugar e recuperar inmobles vai ser prioritario no ano 2024", dixo Ángeles Vázquez, que destacou que, como novidade, as axudas ao aluguer, ás que a Xunta destinará 20 millóns --10 en 2024 e outros 10 en 2025-- refórzanse ata cubrir un 60% a renda mensual dos colectivos de menores de 36 anos, as familias numerosas e monoparentais, os emigrantes retornados e as persoas que levan inscritas un ano ou máis no rexistro de demandantes.
Todas estas persoas deberán cumprir requisitos como non superar tres veces o Iprem --uns 25.200 euros-- e ter un contrato de aluguer ao longo do último ano. A titular de Vivenda detallou que estas axudas irán en función das necesidades e non se concederán de forma lineal.
AXUDAS Á COMPRA E REBAIXA FISCAL
Así mesmo, en canto aos apoios para a compra de vivenda habitual, a Xunta convocará subvencións para a adquisición de vivendas en centros históricos (0,5 millóns de euros), de inmobles protexidos (1,05 millóns) e en municipios de menos de 10.000 habitantes (1,9 millóns), dirixida neste caso, en exclusiva, a menores de 35 anos.
Ademais, manterase a liña de avais públicos da Xunta por un importe de ata 5 millóns de euros para apoiar á mocidade na compra da súa primeira vivenda.
DECLARACIÓN DE ZONAS TENSIONADAS
Por outra banda, na rolda de prensa e preguntada pola decisión da Xunta de incluír na lei de acompañamento dos presupostos mecanismos para regular a declaración de zonas de aluguer tensionadas, a conselleira explicou que se optou por esta fórmula ao "non estar habilitada" na lei estatal ningunha fórmula para proceder a esta declaración.
