Piden incluír a defensa, protección e coidados dos animais no Código Civil de Galicia
No marco do Día Internacional dos Dereitos dos Animais (10D), a Fundación Franz Weber (FFW) reivindicou que o Código galego é un espazo "apropiado" para considerar aos animais como "parte da sociedade".
Por Europa Press / Redacción | SANTIAGO DE COMPOSTELA | 10/12/2023 | Actualizada ás 16:36
No marco do Día Internacional dos Dereitos dos Animais (10D), a Fundación Franz Weber (FFW) reivindicou a adopción da defensa, protección e coidados dos animais no Código Civil de Galicia. "Entendemos que é unha necesidade dotar aos animais dunha consideración como seres sentintes tal como sucede no caso do Código Civil catalán ou mesmo a Constitución Política de Cidade de México", explicou nun comunicado a fundación para protexer a flora e a fauna.
Deste xeito sinalaron que o Código galego é un espazo "apropiado" para considerar aos animais como "parte da sociedade". "A inclusión dos coidados e a defensa dos animais no Código xurídico propio suporía un paso adiante moi importante, que evidenciaría o compromiso da comunidade autónoma coa materia, con independencia dos sucesivos Gobernos e da súa cor política", trasladou a FFW.
Por outra banda, a fundación instou á Xunta a asumir o seu "liderado", en relación á 'Lei de Benestar Animal de 2017' que contemplou diferentes medidas "innovadoras" para previr prácticas de crueldade e a cal, segundo a fundación, non se desenvolveu "o seu regulamento". A Fundación Franz Weber reclamou "maior apoio económico e técnico" aos concellos e entidades protectoras, co fin de cumprir coa normativa estatal.
