Protestas nas rúas de seis localidades galegas en defensa das montañas fronte á "especulación enerxética"

Con motivo do Día Mundial das Montañas, a Coordinadora 'Eólica Así Non', conformada por máis de 200 plataformas, colectivos e organizacións galegas, saíu ás rúas de seis localidades galegas baixo o lema 'Defendemos as montañas contra os gobernos e especuladores'. Nesta ocasión, o obxectivo era destacar o papel que a sociedade civil organizada "xogou nos últimos tres anos en defensa das montañas e, en xeral, do territorio galego fronte ao actual espolio eólico, despois de ser traizoada e abandonada polos gobernos do Estado e da Xunta" que, engade, "puxéronse ao servizo unicamente dos intereses do lobby enerxético".

Amil (Moraña), A Fonsagrada, Lugo, Val do Dubra, Vilar do Barrio e Ortigueira foron as localidades que acolleron mobilizacións esta fin de semana. En todas elas leuse un manifesto no que se destacaron as funcións ecolóxicas e sociais que cumpren as montañas galegas. Así, 'Eólica Así Non', reclamou nesta xornada a consideración das montañas como ecosistemas de "interese público superior", como "principais garantes de saúde, seguridade e futuro do pobo galego", fronte a "a invasión eólica e a enerxía especulativa".

Ademais, os manifestantes instaron á Xunta e ao Goberno central a demostrar que gobernan "para o interese xeral" e que buscan unha transición ecolóxica "ordenada, xusta, sustentable e ao servizo do pobo galego". Estes actos reivindicativos concluíron co anuncio das plataformas e organizacións sociais de seguir mobilizando á sociedade galega e recorrendo nos tribunais "os polígonos eólicos autorizados e ilegais" ata frear o que consideran "un asalto sen precedentes ao medio rural e ao medio ambiente".

AMIL, A "MÁIS MULTITUDINARIA"

Segundo os organizadores, a concentración celebrada en Amil, no municipio pontevedrés de Moraña, foi a "máis multitudinaria". Alí, varios centenares de persoas participaron nunha manifestación en torno ao santuario dos Milagres ao berro de 'Non xirarán'. Os promotores desta marcha acusaron ao Goberno Central e á Xunta de abandonar "a súa función pública" para porse "ao servizo do lobby enerxético". O manifesto, lido por Begoña Rodríguez e Patricia Gamallo, de Amil Sen Eólicos, Maruxa Blanco do Colectivo do Vento de Campo Lameiro, e Rocío García, de Alarma na Terra de Montes, acusou á Xunta de "prevaricar" por actuar "recortando a capacidade de intervención" dos afectados.

Tamén criticou a súa "manobra golpista" ao declarar de "interese público superior" os proxectos tras reformar a lei para facelos "prevalecer sobre calquera outra actividade no territorio" para "esquivar as sentenzas xudiciais que paralizan e anulan" aqueles que, sendo "ilegais", foron recorridos pola cidadanía. Precisamente, sobre o polígono eólico Acibal que se está construíndo en terreos dos concellos de Moraña, Barro e Campo Lameiro, denunciaron que están a ser "testemuñas" de "como se transforma un monte en terreo industrial", destruíndo xacementos de arte rupestre, o hábitat do gando mostrenco e humidais arruinados polas obras de instalación dos aeroxeradores. "A Xunta e Augas de Galicia miran para outro lado" e o concello "queda de brazos cruzados, incapaz de defender o seu territorio", afirmaron.

Ademais do monte Acibal, a Coordinadora tamén advertiu sobre os efectos dos polígonos eólicos previstos na Serra do Galiñeiro, da Groba, da Fracha, do Cando, do Candán, o Monte Peón, Monte do Pé, Montes Cádavo, Conla, Xiabre e O Castrove, entre outros. Por iso, nesta mobilización que celebran por terceiro ano consecutivo esixiron a "conservación dos espazos naturais" coa actualización do catálogo de zonas húmidas, a ampliación da Rede Natura e a catalogación dos recursos arqueolóxicos. Tamén reclamaron que se deteña a "discriminación do medio rural" e a paralización dos proxectos eólicos "polos principios de precaución e non regresión ambiental".

A ASOCIACIÓN EÓLICA DEFENDE "ESPECIAL COIDADO" AO CREAR OS PARQUES

Pola súa banda, a Asociación Eólica de Galicia defendeu, con motivo do Día das Montañas que se celebra este luns, o "especial coidado" nas intervencións cando se crean parques eólicos, así como a integración dos muíños de vento que é "ordenada, equilibrada e cada vez maior". Así o declararon nun comunicado de prensa, no que sinalaron que a localización destas infraestruturas "adoita estar en amplos espazos de monte pelado e de difícil acceso".

Por iso, incidiron na obrigación de limpar e conservar adecuadamente a zona, a declaración de impacto ambiental esixe a protección de aves, quirópteros e outras especies e, engadiron, que a actuación eólica é a "única onde todo volve ao seu estado primitivo", un feito para o que puxeron como exemplo a Estaca de Bares.

Ademais, fixeron referencia a un estudo recente que "demostra a boa convivencia" dos parques eólicos cos mamíferos. A mostra abarcou unha vintena de recintos e foron 12 meses de investigación tras os que concluíron que a comunidade de mamíferos presente nos parques "non difire" da existente na contorna.