O PSdeG responde a Sumar: "Non nos conformamos con gobernar. Queremos gañar"

O secretario xeral do PSdeG, Valentín González Formoso, asegurou que os socialistas van pelexar para gañar as eleccións galegas. "Non nos conformamos con gobernar", recalcou de face a un posible acordo de goberno con outras formacións.

Fíxoo ao ser cuestionado este luns polos xornalistas, nun acto na Coruña, sobre o chamamento da líder de Sumar e vicepresidenta do Goberno, Yolanda Díaz, de traballar "en conxunto" co BNG e o PSdeG para "gañar a Xunta".

"Entendo que calquera formación política progresista que leva comprobando que as políticas económicas, culturais, sociais e demográficas en Galicia empobrecen o país teñan ansias por entrar no Goberno da Xunta de Galicia", afirmou Formoso.

A este respecto, apuntou que o seu partido coincide "absolutamente" con este argumento. "Compartimos loxicamente esa visión", dixo . A pesar diso, o dirixente socialista incidiu en que os socialistas non se conforman con gobernar e que o seu obxectivo é gañar os comicios galegos.

O secretario xeral do PSdeG, Valentín González Formoso | Fonte: PSdeG