Galicia ten un saldo mirgratorio positivo de máis de 27.000 persoas en 2022
Rede Localis advirte no seu último informe que o despoboamento en Galicia é unha "evidencia" que hai que atender con servizos públicos e tratar de frear para non xerar cidadáns de "primeira" e de "segunda".
Por E.P. | Santiago | 20/12/2023 | Actualizada ás 13:46
Galicia rexistrou un saldo migratorio positivo de 27.251 persoas en 2022, o que supón a maior cifra nos últimos 15 anos --a serie histórica comeza en 2008--, segundo os datos publicados polo Instituto Nacional de Estatística (INE) este mércores.
Este saldo migratorio é positivo na comunidade galega tanto de persoas procedentes do estranxeiro (25.867) como doutras comunidades (1.384). Ademais, supón triplicar o rexistro positivo de 12.836 persoas en 2021.
Así, de Galicia emigraron ao estranxeiro ao longo do ano 13.414 persoas, mentres chegaron á comunidade 39.281 persoas doutros países. Venezuela (5.066) destaca entre os países con máis migrantes chegados a Galicia en 2022, seguido de Colombia (4.694), Perú (2.503), Brasil (1.876), Ucraína (1.848) e Arxentina (1.771).
En cambio, Portugal é o país ao que emigraron máis persoas desde Galicia en 2022, con 516 persoas. Séguenlle: Estados Unidos (406), Reino Unido (373), Venezuela (359), Suíza (355) e Brasil (341).
No tocante as migracións de galegos a outras comunidades, Madrid sobresae ao recibir 4.708 persoas, seguida de Cataluña (2.441), Andalucía (2.018), Canarias (1.806) e Castela e León (1.802). Mentres, Madrid (4.748), Cataluña (2.966) e Andalucía (2.131) son as autonomías das que proceden o maior número de persoas chegadas a Galicia.
O DESPOBOAMENTO PODE CREAR CIDADÁNS DE PRIMEIRA E SEGUNDA
Rede Localis advirte no seu último informe que o despoboamento en Galicia é unha "evidencia" que hai que atender con servizos públicos e tratar de frear para non xerar cidadáns de "primeira" e de "segunda". Así o explicou este mércores na presentación do V Informe de Rede Localis a coordinadora do documento, María Cadaval, acompañada pola directora xeral de Administración Local, Natalia Prieto, quen valorado a súa "importancia" para coñecer pautas e propostas de acción.
O informe mostra que o 64% de municipios en Galicia teñen menos de 5.000 habitantes: 81 en Ourense, 55 en Lugo, 42 na Coruña e 23 en Pontevedra. A coordinadora do informe, María Cadaval, detallou que os obxectivos do estudo son reter a poboación, consolidar a calidade democrática e garantir a calidade de vida a través da revitalización dos territorios, a simplificación da estrutura administrativa e a diversificación económica.
Con todo, a coordinadora apuntou a que "non existen" solucións estandarizadas, senón que hai que atender ás "cuestións particulares" de cada municipio. Natalia Prieto tamén apuntou que é "necesario" cambiar e adaptar a 'Lei de Administración de Galicia' do ano 1997. Segundo a directora xeral, este cambio producirase ao longo o 2024.
"Debemos tentar garantir que todos os cidadáns, con independencia de onde vivan, poidan ter acceso ás mesmas prestacións e servizos públicos e que teñan as mesmas condicións de vida", declarou a directora xeral de Administración Local.
