Activada a alerta laranxa por temporal costeiro no litoral da Coruña e Pontevedra para este mércores
A Xunta lembra a importancia de manterse afastado da liña de costa
Por Europa Press / Redacción | SANTIAGO DE COMPOSTELA | 16/01/2024 | Actualizada ás 13:13
A Dirección Xeral de Emerxencias e Interior de Vicepresidencia Primeira da Xunta activou a alerta laranxa para este mércores por temporal costeiro nos litorais das provincias da Coruña e de Pontevedra.
Segundo a Axencia Estatal de Meteoroloxía (Aemet), o fenómeno meteorolóxico adverso estará activo desde a tarde por vento do suroeste de forza 7 que pode chegar ocasionalmente a forza 8 no noroeste e oeste da Coruña. Haberá tamén mar combinado do suroeste con ondas de ata seis metros.
Por este motivo, e co fin de garantir a seguridade dos bens e as persoas, Emerxencias, a través do 112 Galicia, informou da situación aos concellos das provincias afectadas; deputacións, servizos provinciais e agrupacións de voluntarios de Protección Civil e aos clubs náuticos, entre outros.
Ante esta situación, a Xunta lembra a importancia de manterse afastado da liña de costa, isto é, diques, rompientes e paseos marítimos. Tamén que se extremen as medidas de seguridade á hora de realizar calquera actividade no mar e que se revisen os cabos e amarres das embarcacións.
