Feiraco aposta polo vehículo híbrido

Feiraco adquiriu dez vehículos híbridos dentro do seu compromiso coa sustentabilidade. Rotulados coa nova identidade visual de Feiraco e co logotipo de Galicia Calidade, os vehículos modelo Toyota Yaris pretenden axudar no aforro económico e enerxético para a cooperativa. 

Segundo a empresa leiteira, a combinación dun motor de combustión operando sempre á súa máxima eficiencia e a recuperación de enerxía do freado (útil especialmente en tramos curtos) fai que estes vehículos alcancen un mellor rendemento, sobre todo en estradas moi transitadas, de forma que se reducen significativamente tanto o consumo de combustible como as emisións contaminantes.  

"Feiraco realiza un uso sustentable de todos os recursos naturais: materias primas, enerxía calorífica (apostando por combustibles respectuosos co medio ambiente como o gas natural e reducindo ano tras ano os consumos), enerxía eléctrica, auga e papel", apunta a cooperativa. Ademais, o 100% dos residuos que xera seguen un adecuado tratamento, priorizando accións de reutilización e reciclaxe e, en caso contrario, enviándoos a un xestor autorizado de residuos para a súa valorización final.