Un 20% dos opositores non acoden ás probas para dúas categorías de enfermaría, odontoloxía e enxeñeiro técnico
Por primeira vez, unha muller realizará o seu exame desde fóra de Galicia, en concreto, desde Canarias, ao estar ingresada por embarazo
Por Europa Press / Redacción | Compostela | 04/02/2024 | Actualizada ás 12:02
O Recinto Feiral Internacional de Galicia (Silleda) acolle este domingo a celebración das probas de acceso ao Sergas nas categorías de Enfermaría pediátrica, Enfermaría especialista en saúde mental, enxeñeiro técnico e odontólogo de atención primaria, ás que acudiron 536 persoas das 669 que estaban convocadas (80,1% de participación).
En concreto, na categoría de Enfermaría pediátrica realizaron o exame 144 dos 162 aspirantes admitidos (88,9%); en Enfermaría especialista en saúde mental, 103 das 113 persoas admitidas (91,1%), na categoría de Enxeñeiro técnico, 91 dos 146 convocados(62,3%) e, no caso da categoría de odontólogo/a de atención primaria participaron 198 das 248 persoas admitidas (79,8%).
O Servizo Galego de Saúde oferta na xornada deste domingo 31 prazas de Enfermaría especialista en Saúde Mental, 32 prazas de Enfermaría especialista en pediatría, 10 para a categoría de enxeñeiro técnico, 17 prazas para a categoría de odontólogo de atención primaria, e 306 prazas de celador.
No conxunto deste fin de semana, un total de 18.300 persoas están convocadas a participar nas probas selectivas das 779 prazas que o Sergas ofertou en 10 categorías do sistema sanitario público galego.
EXAME DESDE CANARIAS
Así mesmo, segundo trasladou a Consellería de Sanidade, por primeira vez na historia, unha das mulleres aspirantes a unha das prazas realizará o exame desde fóra de Galicia. En concreto, desde o Hospital Materno Infantil de Las Palmas de Gran Canaria, onde se atopa ingresada por estar embarazada a termo.
