O ministro de Industria asegura que Alcoa ten que "cumprir os compromisos asinados no 2021"
Jordi Hereu estivo este venres nas Pontes nun encontro con empresarios.
Por Europa Press / Redacción | SANTIAGO DE COMPOSTELA | 09/02/2024 | Actualizada ás 18:32
O ministro de Industria e Turismo, Jordi Hereu, asegurou que Alcoa ten que "cumprir os compromisos asinados no 2021" e comprometeuse a que o Goberno "controle e faga o seguimento" deste desenvolvemento de centros produtivos "que teñen presente e futuro".
"Nós estamos aquí para defender os proxectos industriais en Galicia e en toda España, pola gran implicación que teñen no desenvolvemento dos territorios, de maneira que estamos para esixir o compromiso das compañías en centros industriais tan importantes", sinalou.
Así o asegurou o integrante do Goberno de España nas Pontes de García Rodríguez, onde acudiu na mañá deste venres para participar nun encontro con empresarios chegados de varios puntos de Ferrolterra e doutros puntos de Galicia, denominado 'Ferramentas para o impulso da industria e o desenvolvemento empresarial'.
Neste foro, en declaracións aos medios, Hereu detallou que "As Pontes é un magnífico exemplo da transición que o sistema produtivo está a facer en toda España e que aquí se reflicte perfectamente". "Estamos a facer a transición enerxética, que, xunto coa transición dixital, son as dúas grandes transformacións que estamos a facer", reivindicou.
REINDUSTRIALIZACIÓN
O ministro de Industria e Turismo incidiu en que "o gran obxectivo en toda España é a reindustrialización, o dar novas claves e un impulso moi importante á industria".
"Galicia é un escenario privilexiado e aquí a aposta da política pública de fondos europeos, para facer esta transformación e este impulso á industria, é unha gran prioridade e aquí é o proceso que estamos a facer", sinalou.
No caso das Pontes, ha destallado que "despois do peche da central térmica, necesita un impulso para a súa reindustrialización", e que por iso están implicados "en moitos proxectos de novas enerxías e que teñen que dar pé ao hidróxeno verde, a moitos procesos onde a enerxía é un vector moi importante". "Estamos a inxectar unha cantidade histórica de fondos de política pública xustamente para axudar a esta transformación", indicou.
