Febreiro acaba con sete mortes en accidentes de tráfico en Galicia
No que vai de ano faleceron na estrada 169 persoas, 23 persoas máis que no mesmo período do exercicio anterior.
Por Europa Press / Redacción | Madrid | 01/03/2024 | Actualizada ás 14:18
O mes de febreiro de 2024 finalizou con 74 sinistros mortais rexistrados nas estradas españolas nos que perderon a vida un total de 77 persoas, o que representa seis mortes máis que no mesmo mes do ano anterior. Deles, sete son en Galicia. Así o deu a coñecer este venres a Dirección Xeral de Tráfico (DGT), que detallou que estas cifras de sinistralidade prodúcense nun contexto no que a mobilidade aumentou un 4,4 % respecto de febreiro do ano anterior, rexistrándose 31,1 millóns de movementos de longo percorrido.
En relación cos falecidos por tipo de vía, os datos de Tráfico revelan que aumentaron tanto en autoestradas e autovías (21 mortes en febreiro de 2023 fronte a 26 do mes analizado), como en vías convencionais (50 mortes en febreiro de 2023 fronte a 51 do mes analizado). Respecto o medio de desprazamento, os colectivos que incrementan a súa sinistralidade son os que se desprazaban en turismo (+ 7) e en moto (+ 4). En cambio, en febreiro redúcense os peóns falecidos (- 4), así como os falecidos usuarios de bicicleta (- 2).
Durante o mes de febreiro aumentaron as saídas de vía (+ 4), as colisións laterais (+ 3) e as colisións traseiras e múltiples (+ 4), tipos de sinistros nos que faleceron 33, 12 e 11 persoas respectivamente. Pola contra, descendeu o número de falecidos por colisión frontal, rexistrándose dez falecidos, cinco menos que en febreiro de 2023.
Sobre o uso dos sistemas de seguridade, as cifras de Tráfico indican que 14 dos falecidos non utilizaban o correspondente sistema de seguridade no momento do sinistro, todos eles viaxaban en turismo e non levaban posto o cinto de seguridade. Por franxa de idade, os que máis aumentan a súa sinistralidade son os de 35 a 44 anos (20 falecidos, fronte aos 13 do mesmo mes do ano anterior) e os de 45 a 54 anos (14 vítimas mortais fronte ás 8, de febreiro de 2023).
COMPORTAMENTO POR CC.AA.
En febreiro de 2024, as diferentes comunidades autónomas tiveron un comportamento moi similar ao que se rexistrou no mesmo período de 2023. Andalucía rexistrou un falecido máis, ao pasar de 14 a 15 mortes; e en Baleares creceu a sinistralidade ao pasar de tres a catro falecidos. Así mesmo, en Cataluña os falecidos pasaron de seis a sete; na Comunidade de Madrid, de tres a catro; na Rexión de Murcia, de tres a catro; en Navarra, de dúas a tres; na Rioxa, dun a dous; e na Comunidade Valenciana, de seis a oito falecidos.
En cambio, Asturias non tivo falecidos en febreiro, fronte á morte do ano anterior, mentres que en Estremadura morreron dúas persoas en sinistros viarios, fronte ao catro rexistradas en febreiro de 2023. Rexistraron as mesmas cifras que en febreiro de 2023 nas comunidades de Aragón, cunha vítima morral; Canarias, onde houbo tres; en Cantabria, unha; en Castela-A Mancha, sete; Castela e León, sete; en Galicia, sete; e no País Vasco, dous.
Os días con máis vítimas mortais foron o domingo 4, o sábado 10 e o mércores 28 de febreiro, con seis falecidos cada día. En contraposición, en febreiro houbo catro días nos que non se rexistraron vítimas mortais por sinistros na estrada. No que vai de ano faleceron na estrada 169 persoas, 23 persoas máis que no mesmo período de 2023.
