Créase o 'Cartón 8M', que concederá 1.134 euros a mulleres que emprendan no rural ourensán
Darase a mulleres menores de 30 anos que poñan en marcha iniciativas empresariais en concellos de menos de 10.000 habitantes.
Por Europa Press / Redacción | OURENSE | 05/03/2024 | Actualizada ás 14:32
A Deputación de Ourense anunciou a creación do 'Cartón 8M', que concederá unha axuda de 1.134 euros a mulleres menores de 30 anos que poñan en marcha iniciativas empresariais en concellos de menos de 10.000 habitantes. Este martes, o presidente provincial, Luís Menor, presentou a iniciativa, que se enmarca dentro das accións de apoio ao emprendemento do goberno ourensán, segundo explica a institución nun comunicado.
Menor incidiu na importancia de "demostrar con feitos, non só con palabras que as políticas de igualdade son unha prioridade" para o goberno que encabeza, que dedica á iniciativa un orzamento de 150.000 euros. As axudas do 'Cartón 8M' son compatibles con outros apoios de distintas administracións e pode solicitarse a través dun trámite único coa solicitude de alta como empresaria autónoma na Deputación de Ourense.
A solicitante poderá tramitar por videoconferencia "presentando a solicitude coa firma por voz da emprendedora", segundo explicou o goberno provincial, que abonará un cartón cun saldo de 1.134 euros nun prazo "máximo" de 8 días. "Debemos traballar por un territorio no que cada vez exista unha maior porcentaxe de empresas lideradas por mulleres para camiñar xuntos na transformación da sociedade cara unha crecente igualdade emprendedora no rural", aseverou Menor.
