Proposta do PP para crear un censo municipal de locais comerciais baleiros en Santiago

A concelleira do PP de Santiago Olaya Otero afirmou que o seu partido aposta pola creación dun censo municipal de locais comerciais baleiros. Por iso, remarcou, que levaron ao pleno unha proposta que se "aprobou por unanimidade" fai tres meses pero actualmente "nada se sabe" sobre a súa iniciativa. "A nosa proposta sostense na necesidade de proporcionar información detallada e actualizada sobre o estado dos locais dispoñibles, as súas características e as actividades para as que están acondicionados", indicou a concelleira.

Así, detallou que este censo pretende ser unha ferramenta que proporcione aos empresarios e autónomos, que queiran desenvolver a súa actividade en Santiago, unha "forma simple" de atopar o local "máis adecuado". Ademais, continuou, incluiría información sobre negocios que, "sendo economicamente viables", están "próximos ao peche" por xubilación e así fomentar a remuda xeracional, evitando o cesamento da actividade e un novo local sen uso.

Unha persoa pasa por diante dun baixo comercial pechado | Fonte: Eduardo Parra - Arquivo