Sete de cada 100 peregrinos chegados a Santiago en 2023 eran estadounidenses

A Xunta de Galicia puxo en valor o auxe da peregrinación a Galicia procedente de Estados Unidos (EE.UU.), xa que sete de cada 100 camiñantes chegados a Santiago viña do país norteamericano, situándose no segundo posto nas estatísticas só por detrás de España. En concreto, dos máis de 440.000 peregrinos que selaron a súa Compostela en 2023, máis de 32.000 procedía de EE.UU., un 7 % máis que un ano antes, mentres que de España viñan 197.100 persoas. No que vai de exercicio, 376 peregrinos chegaron de Estados Unidos, un 5,11 % do total.

Precisamente este luns o director xeral de Emerxencias e Interior, Santiago Villanueva, e o xerente de Turismo de Galicia, Antonio Casas, recibiron a unha representación da sección consular da embaixada de Estados Unidos en España. No encontro profundouse na seguridade das rutas xacobeas e na súa divulgación.

Na reunión participaron o cónsul da embaixada, Rafael Andrade, e a supervisora da Sección de Cidadáns Americanos, Kimberley Wise, e ambos abordaron o auxe desta peregrinación a Santiago e o traballo da Xunta para garantir a seguridade do Camiño. Nun comunicado, o Goberno galego lembrou que en 2023 levaron a cabo por parte da Policía Autonómica máis de 7.500 actuacións nos distintos camiños para garantir a seguridade dos peregrinos, das que máis de 2.300 correspóndense con inspeccións das distintas rutas.