Por gcdeportes | Compostela | 20/09/2015 | Actualizada ás 02:34
2008, 2010, 2013, 2014… e 2015. Quinto campionato do mundo, terceiro consecutivo. O galego Javier Gómez Noya, con 32 anos, xa é o mellor triatleta de tódolos tempos e entra na historia do deporte galego e mundial. Este sábado en Chicago (madrugada do domingo en Galicia), acadou o quinto título, superando ao británico Simon Lessing, que tiña catro. Un novo récord histórico para o deportista ferrolán nado en Basilea.
Galicia estivo pendente da gran final de Chicago. E o campión galego non fallou. A proba saiu segundo o guión previsto: Gómez Noya controlou a carreira en todo momento e chegou a meta na segunda posición, só por detrás do mallorquino Mario Mola. Máis que dabondo para revalidar o título mundial, xa que lle chegaba con subir ao podio.
Só pasou un momento de apuro, cando ao principiar o segmento da bicicleta quedou cortado cos seus rivais (Mola, Vincent Luis e o reaparecido Jonathan Brownlee), pero axiña recuperou a cabeza da proba. Á última transición chegaron preto de 55 triatletas, e axiña Javi Gómez Noya e Mario Mola fuxiron do resto dos participantes. O ferrolán tentou deixar atrás ao mallorquino, pero no man a man gañou Mola. O galego entrou a catro segundos, e terceiro foi o sudafricano Richard Murray.
Na liña de meta, Gómez Noya insistía no seu vindeiro reto: os Xogos Olímpicos de Rio'2016. Pola súa banda, Mario Mola destacou: "Somos uns afortunados de competir cunha lenda".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.