As horas nas que se acompañe ao médico a familiares non dependentes ou a cargo do traballador non serán retribuídas

O Tribunal Supremo ditou unha sentenza na que se opón a que os traballadores poidan gozar dun permiso retribuído por acompañar ao médico a familiares que non estean ao seu cargo, polo que só procede tal permiso cando os fillos, pais e persoas dependentes estean a cargo do traballador. O fallo do Alto Tribunal parte dunha demanda de conflito colectivo interposta por CC.OO. ante a Audiencia Nacional, á que posteriormente se sumaron os sindicatos UGT, CSIF, USO e ELA, contra a empresa Servinform, cuxo convenio de aplicación é o de 'contact center'.

O sindicato reclamaba en dita demanda o dereito dos traballadores desta empresa a gozar dun permiso retribuído para acompañar ao médico ao pai ou a nai, sen que sexa necesario que os mesmos estean cargo do traballador nin sexan dependentes. A Audiencia Nacional desestimou a demanda sindical alegando que o convenio do 'contact center' establece unha bolsa de 35 horas anuais retribuídas para asistir a consultas médicas da Seguridade Social, estendéndose no plan de igualdade da empresa a que dita bolsa de horas pode utilizarse para acompañar a citas médicas a fillos, pais e persoas dependentes a cargo do traballador.

Esta sentenza da Audiencia determinou ademais que a pretensión sindical ampliaría "de modo abusivo", por carencia de causa razoable, o uso deste permiso que é retribuído con cargo ao empresario. O Supremo entende que o fallo da Audiencia Nacional está "suficientemente motivado" e que os sindicatos recorrentes están a querer estender un dereito contemplado no convenio colectivo "a outros supostos non previstos" no mesmo, como é que o permiso retribuído sexa de aplicación cando o acompañamento médico non sexa a familiares dependentes do traballador. Por todo iso, o Alto Tribunal confirma a sentenza recorrida e desestima os recursos de casación interpostos pola parte sindical.

Fachada do Tribunal Supremo | Fonte: EDUARDO PARRA - ARQUIVO