Controlados os incendios de Rois e Cerdedo-Cotobade, que arrasaron con 160 hectáreas

Os servizos de loita contra o lume deron por controlado o incendio que desde a tarde do luns arrasou 130 hectáreas no municipio coruñés de Rois. O incendio, declarado minutos antes das 18.00 horas do luns na parroquia de Leroño, está baixo control desde as 20.10 horas deste martes, segundo trasladou a Consellería do Medio Rural.

As últimas estimacións cifran en 130 hectáreas a superficia arrasada polas chamas nunha zona na que desde a tarde do luns despregáronse tres técnicos, 39 axentes, 49 brigadas, 40 motobombas, tres pas e medios aéreos. En declaracións a Europa Press este martes, o alcalde de Rois, Ramón Tojo (PP), apuntou á "intencionalidade" do lume. "Case cada ano repítese na mesma zona, un pouco máis abaixo, un pouco máis arriba", afirma.

O rexedor sinala que "o dirán os expertos", pero "todo o mundo apunta" á "moi mala intención" de alguén para plantar lume, declarado na tarde do luns na parroquia de Leroño, próximo á estrada AC-301, "preto do anoitecer" e nunha xornada de vento "terrible". Observa que os incendios se repiten "nunhas parroquias moi coincidentes: pode ser Herbogo, pode Leroño, pode ser Augasantas... Pero están aí, unha desgraza".

A Consellería do Medio Rural da por controlado o incendio que desde a medianoite do martes afecta o municipio pontevedrés de Cerdedo-Cotobade, onde arderon 30 hectáreas. Segundo informou a Xunta, o lume iniciado na parroquia de Caroi está baixo control dos servizos de extinción desde as 19.00 horas deste martes. Ata este momento, traballaron na zona dous técnicos, once axentes, 25 brigadas, 14 motobombas, unha pa e medios aéreos.