Cazar un lobo en Galicia: 2.800 euros
Varias webs ofertan a posibilidade de cazar lobos, rebecos e xabaríns. Os ecoloxistas de ADEGA lembran que está prohibido comercializar o lobo como trofeo e levan o caso á Fiscalía.
Por Galicia Confidencial | O Barco | 10/10/2015 | Actualizada ás 17:05
ADEGA, a maior asociación ecoloxista do país, asegura que vén de denunciar na Fiscalía ambiental as ofertas de trofeos de lobo aparecidas en varias webs de anuncios e caza. GC confirmou que os prezos ofertados varían entre os 1.000 e os 2.800€. Os ecoloxistas din que a oferta de trofeos de lobo está prohibida no país, polo que pode ser causa de delicto penal.
Dende ADEGA sorprende "a naturalidade e absoluta impunidade coa que se anuncian na internet a venta de trofeos de lobo en Galiza, ben por empresas identificadas coa actividade do turismo cinexético, ou simplesmente através dun teléfono móbil nunha web de anuncios xeralista". No primeiro caso, a web Cazarribeirasacra.es, non se especifica o lugar de procedencia de ditos lobos, mais o nome da web da empresa non deixa lugar. No segundo, o trofeo é directamente ofertado en monterías na Reserva da Biosfera dos Ancares lugueses, un espazo protexido, neste caso en "Milanuncios.com".
