Lea no Parlamento entre BNG e PP: Bará acusou a Candia de non ser "neutral" como presidenta da Comisión 7ª
A presidenta da Comisión 7ª, Elena Candia, chama a atención ao grupo nacionalista pola linguaxe empregada na súa intervención
- Alertan de riscos da fábrica de Altri: choiva aceda, augas contaminadas e toxinas que provocan cancro
- Altri declara que a súa planta en Palas "non será prexudicial para a saúde"
Por Europa Press / Redacción | SANTIAGO DE COMPOSTELA | 23/05/2024 | Actualizada ás 20:36
O proxecto que Altri pretende implantar en Palas de Rei volveu a protagonizar unha lea no Parlamento de Galicia por parte dos grupos popular e nacionalista, esta vez na Comisión 7ª de Agricultura.
O grupo do BNG presentou unha proposición non de lei para que o Goberno da Xunta "manteña unha posición contraria" ao proxecto.
Segundo defenderon os nacionalistas, "o que se vendeu como un proxecto circular de produción de 200.000 toneladas de fibras téxtiles, era realmente unha macroplanta de produción de celulosa". "A Xunta de Galicia coñecía desde o primeiro momento o proxecto", destacou.
Para o grupo, trátase dun exemplo "de libro" de "espolio", acusando á Administración autonómica de "esquilmar" o territorio e os recursos públicos.
Así, entre os impactos directos, citaron a contaminación das augas, o impacto no ámbito paisaxístico, patrimonial e natural, na biodiversidade e no sector agroforestal, así como o seu impacto territorial.
"A zona na que se pretende instalar é de uso agrario con actividades do sector servizos, terreos que non teñen características nin cualificación como chan industrial", remarcan.
Censuran ademais que se trata dun modelo baseado en premisas como a dispoñibilidade de chan barato, de eucalipto a gran escala e a prezos baixos e unha primeira transformación con escaso valor engadido.
O PSDEG PIDE "SENTIDIÑO"
Pola súa banda, os socialistas pediron "sentidiño", de forma que non se rexeite taxativamente nada nin se impulse sen as garantías preceptivas, afeando ademais a "polarización" que se está creando en torno ao tema.
Para o grupo do PsdeG o problema vai máis aló e é a falta de política industrial por parte da Xunta, que fai que se fíe a "reindustrialización dunha comarca a unha soa empresa".
Ademais, volveron a solicitar que se lles informe dos datos de creación de emprego, así como do financiamento que recibiría o proxecto por parte do Goberno galego, censurando o "baile de cifras".
O deputado de Democracia Ourensá, Armando Ojea -- único integrante do grupo mixto -- desexou que os informes ambientais e xurídicos sexan "independentes" para clarificar a situación e reflexionou sobre a dificultade de situarse politicamente ante este tipo de proxectos.
A este respecto, advertiu de que non sería correcto situarse a favor "bordeando determinadas cuestións xurídicas ou retorcendo a normativa". "O medio ambiente ten que ser a prioridade a curto, medio e longo prazo", aseverou.
PPDEG: "NON IMOS A INSTAR Á XUNTA A PREVARICAR"
Por último, os populares arrincaron a súa intervención avanzando o seu voto en contra da proposición de forma tallante xa que, apuntan, "instar o Goberno a situarse en contra de Altri" sería "instar o Goberno a prevaricar".
Ademais, acusou ao BNG de demagoxia no seu cambio de opinión respecto de Altri, "o temazo que vai soar o próximos catro anos en emisora do BNG cun único obxectivo: sacar rédito político para desgastar ao Goberno".
Nesta liña, afeou tamén o "vaivén" do PsdeG, ao que lle lembrou que en 2023 presentou unha iniciativa parlamentaria para solicitar o apoio do Executivo galego a Altri, "que recibiu un apoio unánime naquel momento".
LEA ENTRE PRESIDENCIA E BNG
Ao acabar as intervencións, a presidenta da comisión, a popular Elena Candia, chamou a atención ao deputado interveniente do BNG pola linguaxe utilizada, ás veces "agresivo", e lanzou unha reflexión para o conxunto de deputados para que sexan máis "sosegados" nas súas alocucións.
Ao censurar expresións como 'atraco', 'pelotazo' e 'esquilmadores', e facer un chamado ao "decoro", o deputado nacionalista Luís Bará pediu a quenda de palabra por "alusións ao seu grupo parlamentario".
Visiblemente contrariado, Bará acusou a Candia de non ser "neutral" no exercicio das súas funcións como presidenta da comisión; algo que a popular negou, asegurando que a reflexión é "xeral" para todos os grupos, sinalando ademais que o deputado ao que se dirixía non se molestou".
A lea acabou con Elena Candia chamando á orde ata tres veces a Bará, ao que lle retiraba o uso da palabra nese momento. Ademais, pediu que conste en acta o ocorrido.
