9X- O BNG, na procura da voz propia en Europa
Pontón (BNG): "Galicia xógase moito nas eleccións europeas, hai que estar cunha voz propia"
Por Europa Press / Redacción | SANTIAGO DE COMPOSTELA | 24/05/2024 | Actualizada ás 08:56
A portavoz nacional do BNG, Ana Pontón, reivindicou en Santiago que "Galicia se xoga moito" nas eleccións europeas que se celebrarán o 9 de xuño e subliñou a importancia de estar en Bruxelas "con voz propia, libre e sen ataduras para defender aos galegos e ás galegas".
Así o recalcou na tradicional pegada de carteis da campaña electoral ao Parlamento Europeo, xunto á candidata, Ana Miranda, e á alcaldesa de Santiago, Goretti Sanmartín.
Pontón trasladou que o BNG concorre á cita coas urnas o próximo 9 de xuño "coa máxima implicación e coa máxima ilusión a por o escano galego", desde a convicción de que a candidatura do BNG é "a candidatura de país, a que todos os galegos e galegas poden sentir como propia" porque o escano nacionalista foi sempre "moito máis que o escano dunha forza política".
"Foi o escano galego, o escano de país, e así vai seguir sendo con máis forza que nunca tras o 9 de xuño", afirmou, antes de engadir que o BNG é "o equipo de casa, o único que vai defender as cores de Galicia desde a razón e o corazón" fronte a un PP que "mira cara a Madrid, cada vez máis centralista e máis ultra".
Fronte a un PP de Alfonso Rueda cuxa lealdade está "na rúa Xénova, co lobby eléctrico, coas súas empresas amigas e coas multinacionais que queren colocar unha bomba ambiental no corazón do rural", a líder nacionalista situou a un BNG cuxa única lealdade é "cos galegos e coas galegas".
Así, apelou a unha gran mobilización o 9 de xuño para reforzar o escano galego do Bloque da man de Ana Miranda que, recalcou, "servirá para defender os intereses" de Galicia en Bruxelas, pero tamén "para contribuír á construción doutra Europa posible".
