Veciños da Mezquita reciben chamadas de falsos traballadores municipais para pedirlles datos
Desde o Concello explican que non están a pedir tales datos para ningunha tramitación, polo que advirten de que "se tomen as medidas oportunas"
Por E.P. | OURENSE | 28/05/2024 | Actualizada ás 17:55
O concello ourensán da Mezquita viuse obrigado a publicar un bando municipal alertando dunha posible estafa aos seus veciños, despois de que varios deles recibisen chamadas facéndose pasar por traballadores do consistorio.
O bando, asinado polo rexedor, Rafael Pérez Vázquez, informa de que nestes últimos días varios veciños recibiron chamadas telefónicas nas que se fan pasar por persoal do consistorio para pedir datos persoais, que van desde a dirección ou o número de DNI ata información bancaria.
No comunicado, explican que desde o concello non están a pedir tales datos para ningunha tramitación, polo que advirten de que "se tomen as medidas oportunas" e, sobre todo, que "non faciliten datos persoais se non están seguros da persoa" á que llos achegan, "xa que pode tratarse dunha estafa".
A voz de alarma deuna unha veciña, responsable dun negocio, que chamou ao consistorio para saber se unha chamada que recibira previamente era dun traballador municipal ou non, o que fixo que o goberno local decidise publicar a disposición por precaución.
Precisamente onte a garda civil detiña a dous veciños de Madrid e tomaba declaración a outros dous por suplantar a identidade do alcalde doutro concello ourensán, o de Barbadás, para pedir diñeiro a través de WhatsApp a varios veciños en decembro do 2023. Para iso os homes entraron no teléfono e tras facerse pasar pola vítima enviaron mensaxes por esta aplicación.
