Detido un home por tentar secuestrar e acosar a varias mozas de Arzúa

A Garda Civil detivo a un home como presunto autor de varios delitos de coaccións, acoso e detención ilegal en grao de tentativa ocorridos na localidade coruñesa de Arzúa.

Tal como informa a Benemérita, a operación, denominada Stlakron, iniciouse por mor das denuncias interpostas a principios deste mes de xuño. No transcurso da mesma, os axentes pescudaron o modus operandi do agora arrestado, o cal consistía nunha "minuciosa" selección das vítimas, utilizando para iso o seu vehículo particular co que percorría distintos lugares.

Unha vez localizada a posible muller, algunhas delas menores de idade, dedicábase a acosalas pola rúa, chegando mesmo a seguilas ata o interior dos establecementos públicos nos que se introducían. Cando vía o momento oportuno, agarrábaas coa intención de introducilas no seu coche.

Tras identificar o home, foi detido e posto a disposición do Xulgado de Instrución número 1 de Arzúa, que decretou o seu ingreso en prisión.

Detidos | Fonte: GARDA CIVIL