O PPdeG enxalza o traballo das súas 700 concelleiras e 28 alcaldesas: "Sodes o mellor que temos"

O PPdeG reuniu este sábado nun acto na Cidade da Cultura, en Santiago de Compostela, ás 700 concelleiras e 28 alcaldesas que a formación ten nos 313 municipios galegos. Foron recibidas polo presidente do PPdeG, Alfonso Rueda, que reivindicou que son "o mellor" do partido e puxo en valor que una de cada dúas concelleiras galegas son do PPdeG. "Sodes mulleres, pero sobre todo sodes persoas con vocación de servizo público que, desde o goberno ou desde a oposición, dedicades a vosa vida a mellorar a vida dos galegos", manifestou.

Así, pediulles demostrar que o PPdeG cre "na igualdade de verdade". "Para nós é un obxectivo que só se alcanza con esforzo, con traballo diario e con políticas concretas ás que se lles ve o sentido. Ninguén nos vai a ensinar nada sobre igualdade, levámolo no noso ADN, como tantas cousas que levamos moi interiorizadas", subliñou.

FOMENTAR A FLEXIBILIDADE LABORAL

Así mesmo, Rueda comprometeuse a "seguir fomentando con políticas reais" a flexibilidade laboral, con medidas que "profunden na conciliación laboral para concienciarse de que este é un valor que se debe fomentar". Do mesmo xeito, tamén asegurou que seguirán apoiando ás vítimas de violencia machista "sen ningún paso atrás e con todo convencemento". Para concluír a súa intervención, Rueda tivo palabras de agradecemento e de recoñecemento para as conselleiras que forman parte do seu Executivo, así como para a líder do PP de Lugo, Elena Candia, ou a secretaria xeral do PPdeG, Paula Prado.

O PPdeG organiza un encontro con todas as súas concelleiras e alcaldesas.. PPDEG | Fonte: Europa Press