Por Xurxo Salgado | Compostela | 04/12/2015 | Actualizada ás 10:00
As declaracións que o alcalde de Ferrol, Jorge Suárez, fixo na entrevista que tivo con Galicia Confidencial semella que están dando moito que falar. O presidente da Xunta, Alberto Núñez Feijóo, advertiulle este xoves que "se o que quere é acabar cos políticos profesionais ten bastante traballo na súa Corporación", en alusión a tenente de alcalde, a socialista Beatriz Sestayo.
Referíase o líder do PP as afirmacións realizadas por Suárez sobre os “políticos profesionais”. “O importante é a experiencia política pero o político profesional é unha especie a desterrar. Xa sabemos o que é en Ferrol ter un alcalde que non ten máis profesión que a política”, dicía o rexedor en alusión a ao ex rexedor e conselleiro de Política Social, José Manuel Rey Varela.
Unhas declaracións que non lle gustaron a Feijóo que utilizou a sua tenente de alcalde para devolverlle a crítica. “Hai políticas profesionais que levan moito tempo presentándose e perdendo sempre as eleccións”, suliñou en alusión a Sestayo.
O presidente da Xunta resaltou, pola contra, o traballo realizado por Rey Varela e lembrou que gañou os comicios "as veces que se presentou" e fíxoo "contundentemente", aínda que na última cita coas urnas perdeu o goberno ao non lograr a maioría absoluta. "E fíxoo con moitos máis votos que o alcalde, a tenente de alcalde e outras concelleiras que conforman o goberno. Se o que quere é acabar cos políticos profesionais ten bastante traballo na súa Corporación", ironizou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.