Atopan a unha persoa falecida flotando na praia da Morosa, en Carnota

Unha persoa perdeu a vida este domingo na praia da Morosa, na localidade coruñesa de Carnota. Segundo informou o 112 Galicia, un particular púxose en contacto coa central de emerxencias sobre as 13.30 horas para solicitar asistencia sanitaria para unha persoa que se atopaba inconsciente na praia da Morosa, á beira da boca do río. Nesta mesma comunicación, o alertador indicaba que acharan á persoa flotando na auga e que a sacaron a terra.

Con esta información, os operadores do 112 deron aviso ao Servizo de Urxencias Sanitarias de Galicia-061, a Salvamento Marítimo, ao Servizo de Gardacostas de Galicia, á Garda Civil da Coruña, á Policía Local e á Agrupación de Voluntarios de Protección Civil de Carnota. Xa no lugar, os servizos sanitarios e de emerxencias só puideron confirmar o falecemento, do que polo momento se descoñecen as causas.