O PP quere que a Mesa do Congreso peche en setembro o prazo de emendas á lei de traspaso da AP-9

O PP reclamou á Mesa do Congreso que peche no mes de setembro o prazo de presentación de emendas á lei para o traspaso da AP-9 a Galicia aprobada polo Parlamento autonómico no seu cuarto intento por lograr a transferencia da autoestrada. Nun comunicado emitido este mércores, os populares sinalaron que os seus deputados Pedro Puy, Tristana Moraleja e Celso Delgado serán os relatores do seu grupo no debate do texto na Cámara baixa.

Os deputados populares fixan como unha das súas prioridades do novo curso lograr "avances" na tramitación da lei aprobada por unanimidade na Cámara galega e que foi admitida a trámite no Congreso o pasado mes de xuño. O PP apela a "evitar que se repitan boicots" como o que, din, produciuse na pasada lexislatura, cando a lei do Parlamento autonómico decaeu pola convocatoria de eleccións xerais mentres se tramitaba despois de acumular "ata quince" prórrogas do prazo de presentación de emendas.

Os populares responsabilizan disto a Podemos, Sumar e PSOE, especialmente a estes últimos, aos que tamén acusan de querer "desactivar a transferencia da titularidade e das competencias da AP-9 e limitala a unha transferencia de competencias sobre a administración e a explotación". "Foi a posición boicoteadora dos socialistas ao longo da pasada lexislatura a que impediu que as Cortes aprobasen a Proposición de Lei Orgánica que faría efectiva a transferencia da AP-9 a Galicia", engadiu o PP.

Pedro Puy, Tristana Moraleja e Celso Delgado, deputados do PP | Fonte: PP