Piden un ano e seis meses por darlle un cabezazo a outro que o atacou cunha fouce
Os dous comezaron unha pelexa por unha discusión relacionada cun can.
Por Europa Press / Redacción | SANTIAGO DE COMPOSTELA | 25/09/2024 | Actualizada ás 12:38
Un home acusado de darlle un cabezazo a outro nunha leira no municipio coruñés de Narón, o 19 de xaneiro de 2020, recoñeceu golpear ao seu veciño. "Estabamos no chan forcexeando e deille un cabezado", declarou. "Eu non o agredía o que quería era inmobilizalo", puntualizou durante o xuízo celebrado este mércores na sección segunda da Audiencia Provincial da Coruña.
Na vista, o procesado explicou que os implicados iniciaron unha discusión relacionada co seu can e o outro home "púxose como unha fera". "Veu coa fouce en ristre e ameazándome", concretou para engadir que o seu veciño o "agrediu" e fíxolle "un corte moi fondo no meñique" coa fouce.
A continuación, segundo o seu relato, o acusado conseguiu quitarlle a ferramenta pero o individuo "colleu unha barra de ferro" e encerelláronse "no chan forcexeando". "Ameazoume con que tiña unha navalla e que ía cravarma e nese momento agarreino, deille un cabezazo e inmobiliceino como puiden ata que se tranquilizou", explicou.
Á súa vez, a vítima tamén estaba procesada nesta mesma causa por un delito de lesións con instrumento perigoso por, supostamente, agredir ao primeiro cunha fouce pero quedou "exento" desta acusación debido a "un problema de saúde mental e física".
PETICIÓN DE CONDENA
Na lectura de conclusións, o representante do Ministerio Público e o letrado da acusación particular pediron para o procesado a pena dun ano e seis meses de cárcere por un delito de lesións.
Fixérono en base a considerar acreditados "con informes do médico forense e probas testificais" que "ambos se agrediron mutuamente" e que o procesado "deulle un cabezazo". "Todos coinciden en que presentaba unha especie de corte na zona da boca compatible coa perda dunha peza dentaria", puntualizou o fiscal. En contraposición, a defensa solicitou para o seu cliente a libre absolución. "Reaccionou de maneira defensiva para protexer a súa integridade", argumentou sobre a actitude do mesmo.
