Feiraco e Gadis, entre os premiados pola súa contribución social
A Xunta falla os premios da primeira edición de Responsabilidade Social Empresarial (RSE) de Galicia. O xurado concedeu por unanimidade un total de 8 galardóns e 2 mencións nas tres categorías .
Por Galicia Confidencial | Santiago de Compostela | 18/01/2016 | Actualizada ás 21:20
Na categoría de pequena empresa, no eido social, resultou galardoada Metal Ferrol; no eido ambiental, o premio é compartido para Encapsulantes de Valor Añadido e Generadores Europeos; e a mención nesta categoría é para Porto-Muíños. E no ámbito económico resultou premiada Ambical Proyectos.
Con respecto á mediana empresa, no ámbito social, o recoñecemento é para Feiraco, e no eido económico para a Autoridade Portuaria da Coruña. Por último, na gran empresa resultou gañadora Gadisa, no eido social; e Conservas Calvo obtivo o galardón no ámbito ambiental e a mención no económico.
O xurado estivo composto por representantes das organizacións empresariais e sindicais intersectoriais máis representativas de Galicia, persoas expertas en RSE, así como por membros da Xunta.
A Consellería de Economía, Emprego e Industria indica que celebrará a finais do mes de xaneiro o acto de entrega destes premios que pretenden ser "un recoñecemento público a aquelas iniciativas e boas prácticas desenvolvidas polas empresas galegas en calquera das dimensións ou ámbitos da RSE".
