Por M.V. | Pontevedra | 26/01/2016 | Actualizada ás 20:00
As accións de ENCE pecharon a 2,62 euros o último venres. Arestora, cotizan a 2,91 euros. É dicir, dende que se soubo que o Estado prorrogaba a concesión de Lourizán os títulos revalorizáronse un 11%. Nese mesmo período, o IBEX 25 caeu un 0,3%.
O diferencial mostra claramente a importancia da polémica decisión tomada polo Goberno en funcións. Unha prórroga por sesenta anos que está a desatar un furacán reaccións, non só en twitter, senón tamén na vida política e social do país.
A nivel local, por exemplo, a oposición de esquerdas está enfadada. PSdeG e Marea queren que o Concello de Pontevedra, onde goberna o Bloque, declare ao presidente do Goberno en funcións, Mariano Rajoy, como "persoa non grata".
Buscan así meter presión ao goberno do BNG. O alcalde Miguel Anxo Fernández Lores non se pronunciou sobre esta petición. Iso si, o nacionalista deixou clara a súa oposición á prorroga, que cre produto dunha decisión “centraliza e antidemocrática” para favorecer a unha “empresa altamente contaminante”. "O goberno do Estado acaba de regalarlle a unha empresa privada máis de mil millóns de euros", valorou hoxe Lores.
E o PP que di a todo esto? Cómpre lembrar que a Xunta de Alberto Nuñez Feijóo prometera sacar a Ence da Ría. Hoxe aplaude a decisión do goberno en funcións. "Este goberno está ao lado do emprego, dos traballadores e do futuro sustentable da comunidade", declarou a conselleira Beatriz Mato. A política dixo que botar a Ence suporía prescindir de 800 traballos directos, asumindo as cifras da industria. Mato ocupa o posto de conselleira de Medio Ambiente, o mesmo que ocupara Carlos del Álamo, hoxe sentando no Consello de Administración de Ence.
A porta xiratoria tamén funcionou a nivel do PP estatal. O cargo que ocupa agora Isabel García Tejerina ocupouno no seu día Isabel Tocino Biscarolasaga, hoxe tamén con cadeira no Consello de Administración de Ence. Tejerina argumentou esta mañá que a prórroga busca que a celulosa "poida seguir mantendo todo o emprego que xera" e, asumindo tamén o discurso da corporación, sinalou que ENCE comprometeu "investimentos moi importantes en Pontevedra".
No Parlamento, o portavoz de Territorio do Grupo Socialista, Xosé Sánchez Bugallo, censurou hoxe a prórroga á factoría de Ence en Lourizán para os próximos 60 anos “feita por un goberno en funcións e coa complicidade da Xunta”. Na comparecencia da conselleira de Medio Ambiente, o responsable socialista dixo que a decisión coñecida onte “pon en evidencia as continuas e reiteradas mentiras do PP”.
A deputada do BNG, Ana Pontón colocou na tribuna un cartaz como protesta pola prorroga de 60 anos a ENCE concedida onte polo Goberno central en funcións. O cartel foi retirado por un uxier á petición do novo presidente da Cámara, Miguel Santalices. A Mato Pontón espetoulle que “vostede, Feijóo e Rueda teñen unha responsabilidade directa avalando un informe para que ENCE puidera continuar a pesar mesmo de ir en contra do programa electoral do propio Núñez Feijóo no ano 2009”.
“As portas xiratorias do PP con ENCE son de sobra coñecidas e mostran a sensación de impunidade dos dirixentes populares”, denunciou o deputado Antón Sánchez. O deputado de AGE adiantou que o seu grupo recorrerá xudicialmente a prórroga.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.